Ադրբեջանական APA լրատվական գործակալության փոխանցմամբ՝ Ադրբեջանն Իսրայելից գնել է ականանետեր ու հակատանկային հրթիռներ: Ադրբեջանը Spike-SR և Spike-LR հակատանկային հրթիռների գնման շուրջ համաձայնագիր է կնքել իսրայելական Rafael ընկերության հետ: Բացի այդ, Ադրբեջանի և իսրայելական Elbit Systems ընկերության միջև համաձայնագիր է ստորագրվել Cardom տիպի 120 միլիմետր տրամաչափի ականանետերի գնման շուրջ:
Spike տիպի հակատանկային հրթիռներն Ադրբեջանի զինված ուժերում հայտնվել են 2010 թվականին: Spike-SR հրթիռի քաշը կազմում է 9 կիլոգրամ, այն նախատեսված է 50-800 մետր հեռավորության վրա ընկած թիրախների խոցման համար: Իսկ Spike-LR-ի քաշը կազմում է 13 կիլոգրամ, այս հրթիռը նախատեսված է 200-4000 մետր հեռավորության վրա ընկած թիրախների խոցման համար:
Ինչ վերաբերում է Cardom տիպի ականանետին, ապա այն ի վիճակի է խոցել 7200 մետր հեռավորության վրա ընկած թիրախները: Ականանետի արագաձգությունը կազմում է րոպեում 15 կրակոց:
Հիշեցնենք, որ Ստոկհոլմում գործող Խաղաղության ուսումնասիրության միջազգային ինստիտուտի (SIPRI) հրապարակած վերջին զեկույցում նշված է, որ 2011 թվականին Եվրոպայում ռազմական ծախսերի ամենամեծ աճը գրանցվել է Ադրբեջանում:
2008-2011 թվականներին Ադրբեջանի ռազմական ծախսերն աճել են 89 տոկոսով, ինչը զեկույցում կապվում է Ղարաբաղյան հակամարտության հետ: 2001 թվականին Ադրբեջանի ռազմական ծախսերը կազմել են 300 միլիոն դոլար, մինչդեռ 10 տարի անց՝ 2011 թվականին, այդ ցուցանիշն աճել է 10 անգամ՝ հասնելով 3 միլիարդ դոլարի: Միևնույն ժամանակ Հայաստանի ռազմական ծախսերը 147 միլիոն դոլարից հասել են 414 միլիոն դոլարի:
