Երկարատև երաշտը սպառնում է Իգուասու ջրվեժի գոյությանը: Իգուասուն Բրազիլիայի զբոսաշրջային ամենատեսարժան վայրերից է:
Ինչպես հաղորդում են ինտերնետային լրատվամիջոցները` հղում կատարելով Իգուասուի ազգային պարկին, ջրի ծավալը ջրվեժում եռակի կրճատվել է` մինչև 500 խ/մ վայրկյանում:
Դրա հետևանքով ջրվեժների զգալի մասը չորացել է` ի ցույց դնելով քարե ժայռերը: Բրազիլիայի ու Արգենտինայի սահմանին տեղակայված ջրվեժային համալիրի մեջ մտնում են շուրջ 270 առանձին ջրվեժներ:
Ջրի անկման բարձրությունը հասնում է 82 մետրի, մեծամասամբ` 60 մետրից քիչ ավելի:
Իգուասուն Աֆրիկայի Վիկտորիա ու Կանադայի և ԱՄՆ-ի սահմանին գտնվող Նիագարա ջրվեժների հետ համարվում է աշխարհում ամենագեղատեսիլ վայրերից մեկը:
Բնական համալիրը ներառված է ՅՈՒՆԵՍԿՕ-ի համաշխարհային ժառանգության ցանկի մեջ:
