Շվեդական IKEA ընկերությունը ներկայացրել է կահույք՝ համակցված աուդիովիդեոտեխնիկայի հետ: Այն կոչվում է Uppleva: Այս մասին տեղեկացնում է lenta.ru-ն՝ հղում անելով The Verge բլոգին:
Uppleva-ն իրենից ներկայացնում է պահարան, որում համակցված են DVD/Blu-ray-ը և աուդիոհամակարգը: Պահարանի վրա ամրացված է LED հեռուստացույցը: Այս կոմպլեկտի հետ գնորդին տրամադրվում են շարժական, առանց մալուխների ձայնային ուժեղացուցիչներ:
IKEA-ի ներկայացուցիչների խոսքով՝ նորույթի միակ արժանիքն այն է, որ դրա շնորհիվ տան բոլոր անկյուններն ու պատերը ազատվում են մալուխներից:
Uppleva-ն կստանա Wi-Fi ցանցերի աջակցությունը: Համակարգը կղեկավարվի հեռակառավարման վահանակով: Հեռուստացույցի վրա կլինի 2 USB և 4 HDMI:
Uppleva-ն գնորդին կներկայանա տարբեր գույներով և հեռուստացույցի տարբեր չափսերով: Էկրանի նվազագույն անկյունագիծը կլինի 24 դյույմ: IKEA-ն Uppleva-ի համար 5 տարվա երաշխիք է տալիս: Uppleva-ին տեխնիկան կտրամադրի չինական TCL ընկերությունը:
Uppleva-ն վաճառքի կհանվի աշնանը 6500 շվեդական կրոնով (960 դոլար): Սկզբում համակարգը կվաճառվի եվրոպական 7 երկրներում: Ռուսաստանն այդ թվում չէ: Համաշխարհային վաճառքը կմեկնարկի 2013-ին:
