Գերմանիայի Մանհեյմի շրջանային դատարանը հաստատել է, որ Apple ընկերության iCloud և MobileMe ինտերնետ-ծառայությունները խախտում են Motorola Mobility-ին պատկանող արտոնագրերը: Այս մասին տեղեկացնում է newsru.com-ը՝ հղում անելով SecurityLab-ին: Խոսքն այն տեխնոլոգիայի արտոնագրի մասին է, որը թույլ է տալիս ավտոմատ կերպով iPhone, iPod и iPad –ի միջոցով տեղեկացնել Apple-ի հաճախորդներին նոր փոստային հաղորդագրությունների մասին:
Դատարանի որոշմամբ՝ Apple-ը պետք է Motorola-ին փոխհատուցում վճարի, որի չափը դեռևս հայտնի չէ: Իսկ քանի դեռ փոխհատուցման չափը հստակեցված չէ, վիճահարույց տեխնոլոգիայի կիրառումը Գերմանիայի տարածքում կասեցվել է:
Motorola Mobility-ն հանդիսանում է Google Android պլատֆորմով բջջային սարքերի խոշոգույն արտադրողներից մեկը: Motorola-ն անցած տարի ամռանն իր արտոնագրային պորտֆելներով գնվեց Google-ի կողմից 12.5 միլիարդ դոլարով: Գործարքը դեռևս ընթացքի մեջ է:
Motorola Mobility-ն լիովին ձեռք բերելու դեպքում, Google-ն իրեն ավելի վստահ կզգա Apple-ի և Microsoft-ի դեմ արտոնագրային պատերազմներում: Վերջիններս պնդում են, որ Android պլատֆորմը ստեղծվել է այլ ընկերության մշակած տեխնոլոգիայի հիման վրա: Apple-ի և Motorola-ի միջև հակասությունները սկսվել էին 2010-ի հոկտեմբերին: Motorola-ն դատական հայց էր ներկայացրել մրցակցի դեմ, որին Apple-ը պատասխանել էր դիմահար հայցով: Կողմերի վիճաբանությունները ծավալվում են տարբեր տեխնոլոգիաների՝ 40 արտոնագրերի շուրջ:
Motorola-ի հայցերում շոշափվում են Apple-ի բոլոր արտադրանքները: 2012-ի հունվարին ԱՄՆ-ի միջազգային առևտրի հանձնաժողովը նախնական որոշում է կայացրել Apple-ի հայցով՝ մրցակցին անմեղ ճանաչելով ընկերության 3 արտոնագրերի խախտման վերաբերյալ առաջադրված մեղադրանքում:
