«Ժառանգություն» կուսակցությունը պահպանում է լավ մարզավիճակը և նախընտրական քարոզարշավի շրջանակներում նորմալ աշխատանքային գրաֆիկ է իրականացնում. այսօր կայացած մամուլի ասուլիսի ժամանակ ասաց «Ժառանգության» պատգամավոր Արմեն Մարտիրոսյանը:
«Մեր ցանկությունները գնալով ավելի են մեծանում, և մենք հույս ունենք, որ համամասնական ցուցակով առաջինն ենք լինելու: Միաժամանակ մեր համակիրներից ու բարեկամներից ահազանգեր ենք ստանում, որ «Ժառանգություն» կուսակցության դեմ սև PR է իրականացվում: Բայց սա որևէ կերպ չի ազդելու մեր գործունեության ու ընթացքի վրա: «Ժառանգությունն» ունի իր հստակ ուղին, գաղափարական ուղեգիծն ու նախընտրական ծրագիրը: Մենք բացառապես առաջ ենք նայում ու շարժվում»,- ասաց նա:
Արմեն Մարտիրոսյանի խոսքով՝ կուսակցությունում չկան դոգմաներ, միտքը կաղապարված չէ, և յուրաքանչյուրը սեփական կարծիքն ունենալու իրավունք ունի:
«Մենք ազատ ենք և հնարավորություն ենք տալիս, որ մեր ներսում գաղափարներն ազատ արտահայտվեն: Մեր մեջ չկա մեկը, ով մասնակցել է պետական թալանին»,- ընդգծեց պատգամավորը:
Անդրադառնալով թիվ 6 ընտրատարածքում (նա ևս նույն ընտրատարածքում է առաջադրված-խմբ.) թեկնածուների միջև մրցապայքարին՝ Արմեն Մարտիրոսյանը նկատեց, որ այս պահի դրությամբ ամեն ինչ կարգին է, պատգամավորության թեկնածուները միմյանց հետ նորմալ հարաբերություններրի մեջ են:
«Մենք կրկին պնդում ենք, որ ընտրությունները պետք է լինեն արդար ու թափանցիկ: Դրական է այն, որ գրեթե բոլոր լրատվամիջոցներն անաչառ տեղեկատվություն են մատուցում հանրությանը»,- ամփոփեց նա:
