Քննիչները բացառել են Բրեյվիկի` «տամպլիեր ասպետ» լինելը

Քննիչները չեն գտել այն «տամպլիեր ասպետների» կազմակերպության գոյությունը հաստատող վկայություններ, որոնց թվին իրեն դասել էր նորվեգացի ահաբեկիչ Անդերս Բրեյվիկը:

Դատական նիստի օնլայն հեռարձակումը, որի ժամանակ այս մասին հայտարարել է դատախազը, իրականացնում են նորվեգական NRK և SkyNews հեռարձակող կորպորացիաները:

Ոստիկանության տվյալների համաձայն` Բրեյվիկը, ծրագրելով ու իրականացնելով ահաբեկչությունները, գործել է միայնակ:

Նիստի ընթացքում դատախազը պատմել է, որ Բրեյվիկը Օսլոյից 150 կմ հեռավորության վրա վարձակալել է ֆերմա, որտեղ գրել է իր մանիֆեստն ու ստեղծել ռումբը:

Մեղադրյալը Օսլոյի դատարանում հայտարարել է, որ իրեն մեղավոր չի ճանաչում, թեև իրականացրել է ահաբեկչությունները:

Մուտք գործելով դատարան` նա նացիստների պես բարձրացրել է ձեռքը ու հայտարարել, որ ինքը չի ճանաչում նորվեգական դատարանի լիգիտիմությունը:

Ահաբեկիչն իրեն անվանել է «գրող»:

Հիշեցնենք, որ Բրեյվիկի դատն սկսվել է այսօր: Եթե նա մեղավոր ճանաչվի դատարանի կողմից, ապա վերջինիս կսպառնա 21 տարվա ազատազրկում: Այս պատժաչափը կարող է մեծանալ, եթե նա հասարակության համար ճանաչվի վտանգավոր:

Հիշեցնենք, որ անցած տարվա հուլիսի 22-ին Բրեյվիկը Օսլոյի կենտրոնում պայթեցրել էր ավտոմեքենա, ինչի հետևանքով սպանվել էր 8 մարդ: Այնուհետև նա ուղևորվել էր Ուտոյա կղզի, որտեղ տեղակայված էր երիտասարդական ճամբարը, և կրակ բացել, ինչի հետևանքով կղզում սպանվել էր 69 մարդ: Բրեյվիկի հոգեբուժական հետազոտությունն ընթացիկ տարվա ապրիլին նրան ճանաչել էր մեղսունակ։