Մոսկվայում ձերբակալվել են առևտրականներ, որոնք զբաղվել են կեղծ ռուսական ավանգարդ ստեղծագործությունների վաճառքով: Այս մասին տեղեկացնում է Interfax-ը՝ հղում անելով ՌԴ ներքին գործերի նախարարությանը: Կասկածյալները Սմոլենսկի շրջանի 60-ամյա բնակիչն ու իր դուստրն են, որոք ձերբակալվել են Մոսկվայի «Իզմայիլովո» հյուրանոցում՝ 2,5 ռուբլով 141 բնանկարներ և գծանկարներ վաճառելու փորձի ժամանակ:
Ձերբակալությունից հետո, իրավապահները Դեսնոգորսկում գտնվող նրանց տանը խուզարկություն են անցկացրել, որի ժամանակ հայտնաբերել են տասնյակ կտավներ, ներկեր, կնիքներ և այլն: Փաստի առթիվ հարուցվել է քրեական գործ ՌԴ Քրեական օրենսգրքի 159 հոդվածի 4-րդ մասով, այն է՝ առանձնապես խոշոր չափի մեքենայությունը:
Կեղծ նկարների իրացման գործում մասնակցություն է ունեցել նաև տղամարդու երկվորյակ եղբայրը: Կեղծ նկարների հեղինակի ինքնությունը նույնպես բացահայտվել է: Կձերբակալե՞ն նրան, թե՞ ոչ, չի հաղորդվում:
Ոստիկանության տվյալերով՝ կասկածյալները վաղուց են զբաղվել արվեստի կեղծ գործերի վաճառքով: Միայն 2011 թվականի ընթացքում նրանց հաջողվել է 13 միլիոն ռուբլի ընդհանուր արժողությամբ 273 նկար իրացնել:
Ռուսական ավանգարդի նկատմամբ հետաքրքրությունը, մասնավորապես արտերկրում, վերջին 50 տարիներին կայուն բարձր է: Գների բարձրացմանը զուգահեռ արտ-շուկան լցվել է կեղծ նկարներով: 2009-ին բրիտանական The Independent-ը հրապարակել էր փորձագիտական գնահատական, ըստ որի՝ շուկայում ավանգարդիստների աշխատանքների 50-80 տոկոսը կեղծ է:
