Սկսած 2010 թվականից՝ ՀՀ սպորտի և երիտասարդության նախարարությունը իրականացնում է օն-լայն դրամաշնորհների տրամադրում ՀԿ-ներին: Հասարակական կազմակերպությունները դիմում են նախարարությանը գրավոր, որին կից ներկայացնում են իրենց ծրագիրը, եռամսյակը մեկ՝ համապատասխան հանձնաժողովը գնահատում է դրանք և, ըստ այդմ, որոշում դրամաշնորհի չափը:
Ծրագիրն առաջին անգամ իրականացվեց 2010 թվականի 3-րդ եռամսյակին, որից հետո այլևս դրամաշնորհներ չտրամադրվեցին: «Առաջին լրատվական»-ի հետ զրույցում ՀՀ սպորտի և երիտասարդության նախարարության երիտասարդական քաղաքականության վարչության ծրագրերի մշակման և իրականացման բաժնի պետ Արմեն Պապյանը նշեց, որ դրամաշնորհները չեն տրամադրվել տեխնիկական պատճառներով՝ երիտասարդական միջոցառումների կազմակերպման կենտրոն ՊՕԱԿ-ի լուծարմամբ պայմանավորված. «Ստեղծվեց ԾԻԳ՝ ՊՕԱԿ-ի փոխարեն, որի գործառույթների մեջ չէր մտնում դրամաշնորհների փոխանցումը: Լինում են դեպքեր, երբ ինչ-որ բան արվում է, բայց այնքան էլ իրեն չի արդարացնում, բացի այդ՝ մեր կողմից ներկայացրած հիմնավորումները կառավարության կողմից ընդունվեցին, և 2011 թվականի դեկտեմբերի 1-ից նորից բացվեց երիտասարդական միջոցառումների իրականացման կենտրոնը, հնարավորություն ստեղծվեց ֆինանսավորել ծրագրերը»:
Նա ավելացրեց, որ 2010 թվականի 4-րդ եռամսյակի գնահատված ծրագրերն այս տարի արդեն ֆինանսավորվել են, իրականացվել են նաև 2012-ի առաջին եռամսյակի ծրագրերը և այժմ պիտի իրականացվեն երկրորդ եռամսյակի ծրագրերը: Արմեն Պապյանն ասաց, որ դրանք ունեն սոցիալական, կրթական, որոշակիորեն նաև մշակութային ուղղվածություն. «Համակարգը շատ թափանցիկ է, յուրաքանչյուր ծրագիր գնահատում է առնվազն երեք անկախ փորձագետ, որոնք իրար չեն տեսնում, կատարվում է օն-լայն համակարգով: Երեք փորձագետի միջին գնահատականով էլ որոշվում է՝ ֆինանսավորե՞լ ծրագիրը, թե՞ ոչ»:
Արմեն Պապյանը նաև հավաստեց, որ էականորեն աճել է ներկայացվող ծրագրերի որակը:
