ՄԱԿ-ի գլխավոր քարտուղար Պան Գի Մունը և սիրիական հացով ՄԱԿ-ի ու ԱՊԼ-ի հատուկ բանագնաց Քոֆի Անանը խոստացել են անել ամեն ինչ, որպեսզի ՄԱԿ-ի առաքելությունը Սիրիայում կարողանա շուտափույթ սկսել իր լիակատար աշխատանքը: Այս մասին խոսվում է Պան Գի Մունի և Անանի Ժնևում կայացած հանդիպման մասին հաղորդագրության մեջ:
Հատուկ բանագնացը գլխավոր քարտուղարին տեղեկացրել է սիրիական իշխանության և ընդդիմության հետ ունեցած իր հանդիպումների մասին:
Անդրադառնալով Սիրիայում կրակի դադարեցման հարցին` ՄԱԿ-ի գլխավոր քարտուղարը պնդել է, որ «հենց սիրիական իշխանություններն են պատասխանատվություն կրում բռնության դադարեցման և զորքերի դուրս բերման համար»։ Պան Գի Մունը և Անանը բոլոր հետաքրքրված կողմերին, ներառյալ՝ «Սիրիայի բարեկամներ» խմբին, կոչ են արել «իրենց ազդեցությունը կիրառել, որպեսզի դրդեն ընդդիմությանը բռնությունները դադարեցնելու պատասխան քայլեր կիրառել»:
Հիշեցնենք, որ շաբաթ օրը ՄԱԿ ԱԽ-ն հաստատել է Սիրիա նոր դիտորդներ ուղարկելու մասին բանաձևը: Ավելի ուշ հայտնի է դարձել, որ դիտորդների առաջին խումբը Սիրիա կժամանի կիրակի օրը: Եվրամիությունը ևս ողջունել է ՄԱԿ ԱԽ-ի այս բանաձևի ընդունումը:
Միասնական ընդունված բանձաևում ԱԽ-ն կոչ է անում «սիրիական կառավարությանը և մյուս բոլոր կողմերին ապահովել, որպեսզի դիտորդների առաջնային խումբն ի վիճակի լինի կատարել իր ֆունկցիան, ինչպես նաև ապահովել նրանց անվտանգությունը»: