Ընտրարշավի մեկնարկը քաղաքակիրթ էր և մեղմ: Այսօր «Առաջին լրատվական»-ի հետ զրույցում նման տեսակետ հայտնեց Հայկական սոցիոլոգիական ասոցիացիայի ղեկավար Գևորգ Պողոսյանը`դիտարկելով նախընտրական քարոզչության առաջին շաբաթը:
Ըստ նրա` նախընտրական քարոզարշավի առաջին շաբաթը բավականին լավ անցավ: Նա նշեց, որ դա վկայում է այն մասին, որ նորմալ մթնոլորտ է, որը դուրեկան է: «Խիստ ընդհարումներ, ցեխ նետել իրար վրա, այսպիսի ընդհարումներ չկան: Ես կասեի, որ քաղաքական դաշտում նկատում եմ այն, ինչ տնտեսական դաշտում ավելի շուտ է նկատվել: Կարծես թե, սկսվում է նորմալ քաղաքական մրցակցություն ուժերի միջև, ինչից կարող է շահել միայն ընտրողը: Եթե այսպես շարունակվի` շատ լավ կլինի, եթե մենաշնորհները վերանան նաև քաղաքական դաշտում` դրանից միայն շահելու ենք բոլորս»,- մեկնաբանեց Գ. Պողոսյանը:
Համեմատելով նախորդ խորհրդարանական ընտրությունների մեկնարկը և այս շաբաթը` սոցիոլոգն ասաց, որ դժվար է, որովհետև ուժեր կան, որ մեծ հնարավորություններ ունեն`մեծ հանրահավաքներ են կազմակերպում, իսկ ուրիշները փոքր հանդիպումներ են անցկացնում ակումբներում և տեղերում, որոնք այդքան մասսայական բնույթ չունեն կամ նույնիսկ շատ փոքրաթիվ հանդիպումներ են լինում: «Տեսա, որ «Ժառանգության» հանդիպումներից մեկը շատ փոքրաթիվ էր, բայց դա էական չէ այնքան: Ես կարծում եմ, որ դրականն այն է, որ իրար նկատմամբ իրենք զգուշավոր են և առայժմ վիրավորանքների և մեղադրանքների, սուր քննադատության չեն գնում, որը, միևնույն է, կլինի, ես կարծում եմ անպայման կլինի, բայց առայժմ դա չի նկատվել, կարելի է ասել քաղաքակիրթ սկիզբ էր»,- նկատեց Գ. Պողոսյանը: