Ինչպես տեղեկացնում է իրանական IRNA գործակալությունը, Իրանի միջուկային ծրագրի շուրջ «Վեցյակի» և Իսլամական Հանրապետության միջև Ստամբուլում ընթացող բանակցությունները երեկ տևել են մինչև ուշ գիշեր և այսօր առավոտյան շարունակվելու են:
Իրանական կողմը երեկ օրվա ընթացքում հաղորդում էր, որ բանակցությունները դրական ընթացք ունեն, թեպետ ուշ երեկոյան Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ Քեթրին Էշթոնն ասել է, որ դրանք որևէ արդյունքի չեն հանգեցրել:
Մինչև բանակցություններն էլ փորձագետները կարծիք էին հայտնում, որ դժվար թե այս բանակցությունների ընթացքում նշանակալի փոփոխություններ լինեն, քանի որ Իրանը դրանց սկսվելուց մի քանի ժամ առաջ կրկին հայտարարել էր, որ չի պատրաստվում հրաժարվել իր միջուկային ծրագրից: