Առնվազն 12 մարդ մահացել և չորս մարդ վիրավորվել է Եմենի հարավում գտնվող Ադեն քաղաքում, որտեղ «Ալ-Քաիդայի» գրոհայինները գրոհել են զինվորական բլոկպոստը:
Ինչպես հաղորդում են ինտերնետ-ԶԼՄ-ները, չորս զինծառայող և ութ գրոհային սպանվել են, վիրավոր են մեկ զինծառայող և երեք գրոհային:
Հիշեցնենք, որ այսօր հաղորդվել է, որ Եմենի հարավում կատաղի բախումների հետևանքով վերջին հինգ օրերի ընթացքում զոհվել է առնվազն 222 մարդ, այդ թվում` «Ալ-Քաիդայի» 183 գրոհային: Այս տվյալները ներկայացրել են երկրի անվտանգության ծառայությունում:
Իշխանությունների տեղեկությամբ` նախօրեին ահաբեկչության դեմ պայքարի ստորաբաժանման ավելի քան 200 անդամ գրոհայինների դեմ պայքարելու համար ուղարկվել է Լոդեր քաղաք, որտեղ տեղի են ունեցել բախումները:
Հարկ է նշել, որ «Ալ-Քաիդան» զգալիորեն ամրապնդել է իր դիրքերը Եմենի հարավում և արևելքում անցած տարվա հունվարին երկրում բռնկված անհանգստություններից ի վեր: