ISNA իրանական տեղեկատվական գործակալությունը շաբաթ օրը հաղորդել է, որ ԱՄՆ դեսպանը հանդիպում է խնդրել Ստամբուլում Թեհրանի միջուկային ծրագրի հարցով իրանական բանակցային խմբի ղեկավարի հետ: Համաձայն հաղորդագրության` Սաիդ Ջալիլին ընդունել է առաջարկը:
ISNA –ի հաղորդագրության մեջ չի նշվում ամերիկյան դիվանագետի անունը, սակայն հայտնի է, որ Ստամբուլում բանակցություններին մասնակցում է ԱՄՆ պետքարտուղարի քաղաքական հարցերով տեղակալ Ուենդի Շերմանը:
ISNA-ն մեջբերում է ինչ-որ իրանական դիվանագետի, որն ասել է. «Ամերիկյան դեսպանը խնդրել է հանդիպել Սաիդ Ջալիլի հետ…, և Իրանի միջուկային հարցերով գլխավոր բանակցողը ընդունել է այդ առաջարկությունը»: Այս առնչությամբ ԱՄՆ կողմից մեկնաբանություններ դեռ չեն հնչել:
Միաժամանակ, Fars կիսապաշտոնական տեղեկատվական գործակալությունը մեջբերում է «տեղեկատվական աղբյուրին», որը հերքում է, թե Ջալիլին ընդունել է ԱՄՆ ներկայացուցչի հետ հանդիպման առաջարկը:
Fars-ի աղբյուրը այդ հաղորդագրությունը անվանել է «իրանական պատվիրակության դեմ ուղղված տեղեկատվական ալիքի» մի մասը: Ստամբուլյան բանակցությունների մյուս դիվանագետները ևս չեն հաստատել այդ հանդիպման մասին հաղորդագրությունը: