Յուրաքանչյուրն իր պարտքը պետք է համարի ընտրությանը մասնակցելը: «Առաջին լրատվական»-ի հետ զրույցում ասաց թիվ 13-րդ ընտրատարածքում առաջադրված ՀԱԿ թեկնածու Վիոլետա Պետրոսյանը`անդրադառնալով իր նախընտրական քարոզարշավին:
Նա նկատեց, որ տեսանելի խոչընդոտ չկա իր քարոզարշավի համար: Ըստ նրա` բոլորի համար հիմնական խնդիրը ընտրողների ցուցակն է: «Հայաստանից բացակայող մոտ 7 հարյուր հազար մարդկանց մասին է խոսքը, ովքեր ընդգրկված են այդ ցուցակներում: Դա հիմնական խնդիրն ենք համարում և այսօր մենք աշխատանք ենք տանում մեր տեղամասերով, և կարող եմ ասել, որ մոտ 20-30%-ը առնվազն բացակայում են Հայաստանից մշտապես: Ընտրության մասնակիցների ուռճացված քանակը լուրջ մտահոգություն է առաջացնում և այլևս հավասար մրցակցային պայմանների մասին խոսելն ավելորդ է»,- մեկնաբանեց Վ. Պետրոսյանը` հավելելով, որ բոլոր հիմքերը նախապատրաստվել են, որ այս ընտրությունները ևս կեղծվեն:
Նա նաև տեղեկացրեց, որ քարոզչության ընթացքում այլ խոչընդոտներ չեն եղել: Անդրադառնալով մեկշաբաթյա աշխատանքներին` պատգամավորության թեկնածուն ասաց, որ դեռ իր կարգախոսը որոշված չէ, դրա մասին կմտածի քիչ ավելի ուշ:
«Բակային հանդիպումներ եմ ունենում, մարդկանց հանդիպում եմ, զրույցի եմ բռնվում: Անմիջական շփումը, իմ կարծիքով, ամենակարևոր գործոնն է, որը մարդկանց պետք է ոգևորի, որ անպատճառ գնան ընտրության: Կոչ եմ անում մարդկանց գալիք ընտրություններում իրենց ձայնը տալ ՀԱԿ-ին և ՀԱԿ-ի կողմից մեծամասնական ընտրակարգով առաջադրված թեկնածուներին, բայց ավելի կարևոր է մեզ համար այն, որ մեզանից յուրաքանչյուրն իր պարտքը համարի ընտրության գնալը և պայքարի, որ իր ձայնը տեղ հասնի, դրվի այն նժարի վրա, որ քաղաքական նժարի վրա դրվել է ընտրողի կողմից»,- մանրամասնեց թեկնածուն`տեղեկացնելով, որ այս հորդորները շատ լավ են ընկալվում ընտրողների կողմից:
Հիշեցնենք, որ թիվ 13-րդ ընտրատարածքում առաջադրվել են նաև ՀՀԿ թեկնածուներ Սարգիս Հակոբյանը և Մհեր Սեդրակյանը:
