Թուրքիայում այսօր սկսվել են միջազգային միջնորդների՝ «Վեցյակի» բանակցությունները Իրանի հետ՝ նրա միջուկային ծրագրի վերաբերյալ: Ռուսաստանը ներկայացնում է արտգործնախարարի տեղակալ Սերգեյ Ռյաբկովը, ԱՄՆ-ն` քաղաքական գծով փոխպետքարտուղար Ուենդի Շերմանը: Բանակցությունների համակարգող է հանդես եկել ԵՄ արտաքին գործերի և քաղաքական անվտանգության գերագույն ներկայացուցիչ Քեթրին Էշթոնը:
Թուրքիան միջնորդի դեր է խաղում բանակցող կողմերի միջև: Արևմուտքի երկրները, ինչպես գրում են տեղի լրատվամիջոցները, ցանկանում են, որ Իրանը սահմանափակի ուրանի հարստացման աշխատանքները: Նախատեսվում է, որ այս հարցը ակտիվորեն քննարկվելու է բանակցությունների ընթացքում, չնայած Թեհրանից հնչող հայտարարությունները վկայում են, որ նա մտադիր չէ գործել ի վնաս իր միջուկային ծրագրի: ԵՄ-ն իր հերթին խոսք է տվել հուլիսի 1-ից ուժի մեջ մտնող պատժամիջոցը, ըստ որի Իրանից այլևս նավթ չի ներկրվելու, դադարեցնել:
ԱՄՆ-ի պետքարտուղար Հիլարի Քլինթոնը և Ռուսաստանի արտգործնախարար Սերգեյ Լավրովը բանակցությունների նախօրեին նշել էին, որ բանակցությունների հիմնական նպատակներից մեկը երաշխիքների ստացումն է, որ Իրանի միջուկային ծրագիրը ռազմական նպատակներ չի հետապնդում:
«Վեցյակը» նաև նախատեսում է հասնել Իրանի համաձայնությանը՝ ՄԱԿ-ի և ՄԱԳԱՏԷ-ի մեծ թվով դիտորդներ Իրան ուղարկելու հարցում: Այն, որ Իրանը դեմ չէ իր գործունեության վերահսկողությանը, հասկացրել է Իրանի ատոմային էներգետիկայի գործակալության ղեկավար Ֆուրդին Աբաս-Դիվանին:
Բայց կհամաձայնի՞ արդյոք Իրանը մեծ թվով դիտորդներ ընդունել` դեռ հայտնի չէ: Ըստ էության Թեհրանը պատրաստակամություն է հայտնել կառուցողական երկխոսություն սկսել:
Իրանի ազգային անվտանգության խորհրդի քարտուղար Սաիդ Ջալիլի խոսքերով` Իրանը մի շարք նոր առաջարկներ կանի Թուրքիայում միջուկային խնդրի քննարկման ժամանակ:
Միևնույն ժամանակ, տեղական մի շարք վերլուծաբաններ կարծում են, որ Ստամբուլյան բանակցությունները ոչ մի լավ բան չեն բերելու: Նրանք գտնում են, որ եթե կողմերի մոտ համագործակցության ցանկություն մնա, ապա ծրագիր կմշակվի հարցի հետագա կարգավորման համար, իսկ բանակցությունները կշարունակվեն մեկ ամսից:
Դրա հետ մեկտեղ, Իրանն առաջարկել է որպես հետագա բանակցությունների վայր ընտրել Բաղդադը:
