2016 թ. ավարտվում է Հայկական ատոմային էլեկտրակայանի շահագործման ժամկետը: Մինչ այդ կառավարության ծրագրերում է ԱԷԿ-ի նոր էներգաբլոկի կառուցումը, որը պետք է փոխարինի ներկայիս կայանին: Դեռ անցած տարվա գարնանը, ապա աշնանը պետք է ներդրողների համաժողով հրավիրվեր, սակայն դրանք չկայացան, ու այժմ էլ ոչ մի շարժ չկա: Միակը, որ հետաքրքրություն է հայտնել նոր կայանի կառուցման վերաբերյալ, ռուսական կողմն է: Այս տարվա փետրվարին ՀՀ ռուսական պատվիրակության այցի ընթացքում «Ռոսատոմի» ղեկավար Սերգեյ Կիրիենկոն հայտարարեց, թե Ռուսաստանը համաձայն է նոր ԱԷԿ-ի ֆինանսավորումն ավելացնել՝ ավելի վաղ հայտարարված 20-25 %-ի փոխարեն:
Կկառուցվի՞ նոր ԱԷԿ-ը, կամ ե՞րբ կկառուցվի: Այս հարցերը հստակ պատասխաններ չունեն: Իսկ մինչ նոր կայանի ճակատագիրը կպարզվի, հնից հրաժարվելը Հայաստանին տնտեսական նոր աղետի առջև կկանգնեցնի:
Ատոմակայանների շահագործման ԳՀԻ տնօրեն, տեխնիկական գիտությունների դոկտոր, ՀՀ նախագահին կից ատոմային էներգիայի անվտանգության խորհրդի անդամ և գործադիր քարտուղար Վահրամ Պետրոսյանն «Առաջին լրատվական»-ի հետ զրույցում տեսակետ հայտնեց, որ ատոմակայանը պետք է ունենա ճակատագիր, և այդ նպատակով ներկայում մշակվում է հայեցակարգ, թե ինչ պետք է լինի 2016 թ-ից հետո:
«Այսինքն՝ նախագծային ժամկետը որ լրանում է, պետք ասվի, թե ինչ է լինելու դրանից հետ: Կարող է լինել երկարացնելու, թե կայանը կանգնեցնելու գործընթաց: Այդ փաստաթղթերը պետք է մինչև սեպտեմբերի 1-ը պատրաստ լինեն»,- ասաց Վ.Պետրոսյանը:
Դոկտորի կարծիքով՝ քանի որ Հայաստանը հարուստ չի, պետք է միջոցառումներ ձեռնարկվեն և երկարացվի գործող ԱԷԿ-ի կյանքի տևողությունը, հետո ծրագրվի միջին և ոչ թե բարձր հզորության, 3+1 անվտանգության մակարդակով 2 բլոկի կառուցումը: Ընդ որում՝ դրանք պետք է կառուցվեն 2020-ական թվականների վերջերին:
«35 տարի աշատում եմ միջուկային էներգետիկայում, համեստություն չանեմ, ասեմ, որ տարածաշրջանում միջուկային էներգետիկայի տեղակայանքների գծով միակ դոկտորն եմ: Ատոմակայանի կյանքը երկարացնելը շատ հնարավոր ու ռեալ է: Բավականին շատ միջոցառումներ արդեն արված են, պետք է հաշվարկել, նայել, որ սարքավորումները պետք է փոխվեն, որը թարմացվեն, վերանորոգվեն»,- նշեց Վ.Պետրոսյանը:
Նա տեղեկացրեց, որ ԱԷԿ-ի կյանքը երկարացնելու հատուկ մշակված ծրագիր կա և իրագործվել է ՌԴ-ում, Ուկրաինայում, Ֆինլանդիայում: Վ. Պետրոսյանը վստահություն հայտնեց, որ ԱԷԿ-ի կյանքը կարելի է հանգիստ կերպով 15 տարով երկարացնել: Դրա համար մոտ 200 մլն դոլարի կարիք կլինի, իսկ այս գումարը կարելի է սակագնի մեջ ներառել: «Բավարար չէ, որ մինչև այսօր 8 դրամով է վաճառվում: Նոր ԱԷԿ-ի կառուցման համար 4-5 մլրդ դոլար է պետք: Այլ տարբերակ չկա, սա ամենաշահեկան տարբերակն է»,- վստահեցրեց Վ. Պետրոսյանը:
