Հայ ազգային կոնգրեսի առաջնորդ Լևոն Տեր-Պետրոսյանը իր դարդը լացելու փոխարեն հիմա էլ ուզում է ուրիշ կուսակցությունների «գլխին քար գցել»: «Առաջին լրատվական»-ի հետ զրույցում ասաց ՀՀԿ-ական պատգամավոր Արտակ Դավթյանը՝ անդրադառնալով երեկ Եղվարդում կայացած հանրահավաքի ժամանակ Տեր-Պետրոսյանի հորդորին՝ քվեարկել ցանկացած կուսակցության օգտին, բացի իշխող ՀՀԿ-ից և նրա կցորդ «Օրինաց երկրից»:
«Մինչդեռ ՀԱԿ-ը նախագահական ընտրություններին բավականին լուրջ ընտրազանգված ուներ, որը, սակայն, այժմ իրեն խաբված է զգում: Այս ամենն ինչ-որ տեղ ցավով եմ ասում: Լևոն Տեր-Պետրոսյանն իր կոչերով ՀՀԿ-ին ակնհայտորեն ոչ թե մրցակից, այլ հակառակորդ է դիտում: Այդ մարդը նորից բարիկադներ է կառուցում: Կարծես նրա կյանքի նպատակը իր հայացքներն ու մոտեցումները չկիսող ուժերի վրա ցեխ շպրտելը լինի: Սա ամենացավալին է: Իսկ ՀՀԿ-ն ոչ մի քաղաքական ուժի իր հակառակորդը չի համարում, այլ միայն՝ մրցակից»,- ասաց պատգամավորը:
Ամփոփելով՝ Արտակ Դավթյանն ընդգծեց, որ ՀԱԿ-ն իր այս գործելաոճով ի վերջո հայտնվելու է լուսանցքում, և ժողովուրդն էլ մերժելու է նրան: