Երեկ ՀՀ վերաքննիչ քրեական դատարանում նշանակված Սլավիկ Ոսկանյանի իրավահաջորդի ներկայացուցիչների բողոքի քննությունը՝ ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2012 թ. մարտի 15-ի որոշման, դեմ չի կայացել: Առայժմ հայտնի չէ հայցվոր կողմի միջնորդությամբ դատական նիստը մինչև երբ է հետաձգվել:
Հիշեցնենք, որ 2012թ. մարտի 22-ին Սլավիկ Ոսկանյանի իրավահաջորդի ներկայացուցիչները վերաքննիչ բողոք են ներկայացրել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի որոշման դեմ, որով դատարանը մերժել էր ՀՀ հատուկ քննչական ծառայության ՀԿԳ ավագ քննիչի կողմից կայացրած` քրեական գործի վարույթը կարճելու և քրեական հետապնդում չիրականացնելու մասին որոշման դեմ ներկայացված բողոքը:
2010թ. դեկտեմբերի 30-ին ՀՀ ոստիկանության Լոռու մարզի քննչական բաժնում հարուցվել է քրեական գործ այն փաստով, որ «Վանաձոր» ՔԿՀ-ի կալանավոր Սլավիկ Ոսկանյանը 2010թ. հոկտեմբերի 18-ին դիմել է նույն ՔԿՀ-ի բուժմաս և «Վանաձոր» ՔԿՀ-ի բժիշկ Մարզպետ Մինասյանի կողմից ստացել համապատասխան բուժում, սակայն 2010թ. հոկտեմբերի 24-ին մահացել է:
Քրեական գործի նախաքննության ընթացքում պարզվել է, որ բուժվող հիվանդ Սլավիկ Ոսկանյանը մահացել է 2010թ. հոկտեմբերի 24-ին «Վանաձոր» ՔԿՀ-ի բժիշկ Մարզպետ Մինասյանի կողմից իր մասնագիտական պարտականությունները ոչ պատշաճ կատարելու հետևանքով:
2011թ. օգոստոսի 30-ին ՀՀ հատուկ քննչական ծառայության ՀԿԳ ավագ քննիչ Գ. Պետրոսյանը որոշում է կայացրել քրեական գործի վարույթը կարճելու և քրեական հետապնդում չիրականացնելու մասին:
2011թ. դեկտեմբերի 12-ին Սլավիկ Ոսկանյանի իրավահաջորդի ներկայացուցիչներ Է. Մարուքյանը և Կ. Թումանյանը ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան բողոք են ներկայացրել ՀՀ ՀՔԾ ՀԿԳ ավագ քննիչ Գ. Պետրոսյանի քրեական գործի վարույթը կարճելու և քրեական հետապնդում չիրականացնելու մասին որոշման դեմ:
