«Սա մեր 5-րդ համապետական ընտրություններն են, և ոչ մի անգամ ՕԵԿ-ը փող չի տվել, և չենք տալու, բացառվում է»,- ասում է ՕԵԿ համամասնական ցուցակի 5-րդ տեղով ընտրություններին մասնակցող, պատգամավորության թեկնածու Խաչիկ Հարությունյանը:
Ապա պարզ հարց է տալիս. «Ով շատ փող ունի, նա կարող է շատ իշխանությո՞ւն ունենալ: Վատ ավանդույթ է ձևավորվել` գումարի դիմաց քվե գնելը, որը վատ հանգրվան է ունենում: Պետք է միշտ աշխատել բնակչության հետ»։ Հիմա էլ ՕԵԿ-ը քարոզարշավի հիմնական շեշտը դրել է մարզի շուրջ 60 (30-ը Վանաձորում է) շտաբների ցանցը օգտագործելով` բնակչության հետ հանդիպումներով ու բացատրական աշխատանքով վստահության քվե շահելու վրա:
Խաչիկ Հարությունյանին բարկացնում է այն միտքը, թե «Օրինաց երկրին» ընտրում են հատկապես ավանդների վերադարձման ծրագրի համար։ Նա հակադարձում է. «15 տարվա պառլամենտական կուսակցությունը 200 օրենսդրական նախաձեռնությունների հեղինակ ու համահեղինակ է, ինչո՞ւ միայն ավանդների համար»:
Ընտրություններին մասնակից 9 քաղաքական ուժերը բոլորը մեկը մյուսի հետ պետք է մրցկացեն. «Քաղաքական մրցակցություն՝ ո՛չ քաղաքական պատերազմ, երբեք կողմ չենք եղել քաղաքական պատերազմին, ոչ մեկին չենք սևացրել»:
