Ստամբուլի հայկական «Ակօս» թերթի փոխանցմամբ՝ Թուրքիայի Ազգային մեծ ժողովի (ԹԱՄԺ) խոսնակ Ջեմիլ Չիչեքը, ելույթ ունենալով «Վշտի կիսման ու վերքերի բուժման առաջին քայլ» խորագրով գիտական կոնֆերանսում, հայտարարել է, որ դարերի ընթացքում Օսմանյան կայսրությունում բնակվող հայերը ստիպված են եղել լքել իրենց հարազատ տները, իսկ մենք մոռացել ենք այդ մասին.
«Թուրքիայի քաղաքացիների համար դժվար է իրականության հետ առերեսվելը: Սակայն պետք է հասկանալ, որ երկու ժողովուրդներն ունեն ընդհանուր վիշտ, որը պետք է բուժել: Առաջին համաշխարհային պատերազմի տարիներին ներքին ճնշումը հայերին ստիպեց լքել իրենց հայրենիքը: Դա պետք է խոստովանել:
Պատերազմներն ու բռնության ակտերը, ժամանակ առ ժամանակ զանգվածային սպանություններն ու բռնագաղթերը հանգեցրին հայերի միգրացիային: Այդպիսի պարագայում մարդիկ ապրում էին խոր տառապանքների մեջ, ինչն առաջացրել է հասարակական տարբեր արձագանք: Մենք այն մարդիկն ենք, որոնք նախընտրել են մոռացության մատնել այդ վիշտը:
Օսմանյան կայսրության փլուզման ժամանակ մենք այդ վիշտը թաղեցինք մեր սրտերում, իսկ նորի սկսման համար ամենապրագմատիկն անցյալից չկառչելն է: Վիշտը ծնում է չարություն, չարությունը՝ ատելություն, ատելությունը՝ վրեժ:
Դրա համար էլ ոչ մեկի համար շահավետ չէ անցյալլի տառապանքները փորփրելը: Բոլորի շահերից է բխում դրանից դասեր քաղելն ու այնպիսի միջոցներ ձեռնարկելը, ինչը հետագայում կկանխի այդպիսի դեպքերի կրկնումը: 19-րդ դարի վերջին ու 20-րդ դարի սկզբին օսմանյան կայսրությունում տեղի ունեցած իրադարձությունները պետք է ուսումնասիրվեն բուն Թուրքիայի կողմից՝ նմանատիպ երևույթների կրկնման կանխման համար»:
Հիշեցնենք, որ Ջեմիլ Չիչեքը դասվում է թուրք քաղաքական գործիչների ծայրահեղ հակահայկական թևին՝ հանդիսանալով Քրեական օրենսգրքի տխրահռչակ 301-րդ հոդվածի կնքահայրերից ու ջատագովներից մեկը, ինչի համար էլ ստացել է «301-րդ Ջեմիլ» մականունը:
