Թոմաս Համարբերգը նշեց, որ Սասուն Միքայելյանն ունի առողջական խնդիրներ և ցանկություն հայտնեց, որ նրան շուտափույթ ազատ արձակեն: «Առաջին լրատվականը» ԵԽ մարդու իրավունքների հանձնակատար Թոմաս Համարբերգին հիշեցրեց, որ ինքը միակ եվրոպացի պաշտոնյան էր, որը 2008 թ. մարտի 1-ի իրադարձություններից հետո, այցելելով Հայաստան, հայտարարեց, որ մարտի 1-ի գործով կալանավորվածները քաղաքական հայացքների համար կալանավորված անձինք են, և որ իրականացվում է քաղաքական վենդետտա:
Արդյոք հիմա չի՞ մեղմացել կամ փոխվել Թոմաս Համարբերգի դիրքորոշումը: «Ես չեմ խուսափում քննադատությունից: Ասել եմ բաներ, որոնք ժամանակին լավ չեն լուսաբանվել»,- ասաց Թ. Համարբերգը: Նա հավելեց, որ չպետք է մեկը գործի հանցանք և ասի, որ ինքը քաղաքական շարժառիթներով է կալանավորված և արժանանա ավելի մեղմ պատժի, քան` մյուսը: «Բռնաբարող քաղաքական գործիչը ոչ մի բանով ավելի լավը չէ, քան` մյուս բռնաբարիչները: «Եթե դատարանի կողմից չի ապահովում արդար դատաքննություն, ապա դա աղավաղում է գործի էությունը: Եթե քաղաքական ակտիվիստը դատարանում արժանանում է ավելի վատ վերաբերմունքի, դա նշանակում է, որ օրենքի նկատմամբ հավասարության սկզբունքը չի ապահովում»,- ասաց Թոմաս Համարբերգը: Նա կրկին հիշեցրեց, որ Մարտի 1-ի գործերով եղել է քաղաքական նկատառում:
«Առաջին լրատվական»-ի հաջորդ հարցը վերաբերում էր «Ա1+»-ի ճակատագրին: Թոմաս Համարբերգին հիշեցրինք, որ «Ա1+»-ի գործով Մարդու իրավունքների եվրոպական դատարանը կայացրել էր վճիռ, որը չի կատարվել: «Ես գտնում եմ, որ լրատվամիջոցներում բավականաչափ պաշտպանված չէ բազմախոհության սկզբունքը: Կարծում եմ` այսօր գործող համակարգը այդ բազմախոհությունը չի երաշխավորում»,- ասաց ԵԽ մարդու իրավունքների հանձնակատարը:
