Nintendo-ն որոշել է բաց թողնել Gamescom-2012 խաղային ցուցահանդեսը: Այս մասին գրում է lenta.ru-ն՝ հղում անելով VG24/7-ին: Դրա փոխարեն ընկերությունը ծրագրում է Գերմանիայում անցկացնել մի քանի սեփական միջոցառումներ, որտեղ այցելուները հնարավորություն կունենան խաղալ վերջին թողարկումները՝ նախատեսված Wii U, Wii և ЗDS խաղային ապարատների համար: Ընկերության տարածած հայտարարության համաձայն՝ կազմակերպվող միջոցառումների մասին մանրամասն տեղեկություններ կտրվեն ավելի ուշ:
Այսպիսով՝ ընկերությունը եվրոպական ցուցահանդեսում չի ցուցադրի իր վերջին խաղային ապարատը՝ Wii U-ը, որը շուկա դուրս կգա տարեվերջին: Այն կներկայացվի ամերիկյան E3 ցուցահանդեսում, որտեղ Nintendo-ն կհայտարարի սարքի տեխնիկակական հնարավորությունների և արժեքի մասին:
Gamescom-ը, որը ավանդաբար անցկացվում է Քյոլնում, համարվում է աշխարհում ամենաշատ այցելուներ ունեցող խաղային ցուցահանդեսը: 2011-ին այցելուների թիվը գերազանցել է 275 հազարը: Անցած տարի ցուցահանդեսին ներկայացված էին ավելի քան 550 ընկերություններ՝39 երկրներից:
2012-ին Gamescom-ը կանցկացվի օգոստոսի 15- 19-ը: Ներկա պահին միջոցառմանը մասնակցության հայտ են ներկայացրել այնպիսի ընկերություններ, ինչպիսիք են EA-ը, Ubisoft-ը, Take-Two Interactive-ը, Bethesda Softwork-ը և ուրիշներ:
