Ռուսական Regnum լրատվական գործակալության փոխանցմամբ՝ Ադրբեջանի ԱԳՆ-ի անվտանգության գծով ներկայացուցիչ Գայա Մամեդովը Բաքվում տեղի ունեցած «ՆԱՏՕ-ի Չիկագոյի համաժողովի կարևորությունը. նոր հնարավորություններ եվրատլանտյան գործընկերության համար» միջազգային կոնֆերանսի ժամանակ հայտարարել է, որ ՆԱՏՕ-ն կարող է կարևոր դեր խաղալ տարածաշրջանային անվտանգության ու կայունության հարցում.
«Ադրբեջանը ՆԱՏՕ-ի գործընկերն է, և իր ներդրումն է ունեցել գլոբալ խաղաղության ու կայունության ապահովման հարցում: Ադրբեջանն Աֆղանստանում ՆԱՏՕ-ի օպերացիաների ակտիվ մասնակից է և կարող է կարևոր դեր խաղալ տարածաշրջանային անվտանգության մեջ:
Ադրբեջանի և ՆԱՏՕ-ի միջև համագործակցությունն իրականացվում է երեք հիմնական ուղղությամբ. քաղաքական երկխոսություն, խաղաղապահ առաքելություններին մասնակցություն և Աֆղանստանում անվտանգության ապահովման ներդրում:
Ադրբեջանը հակամարտության մեջ է Հայաստանի հետ և այդ համատեքստում Ադրբեջանի Ազգային բանակը ՆԱՏՕ-ի չափորոշիչներին համապատասխանեցնելը բախվում է որոշակի խնդիրների: Դրա համար էլ անհրաժեշտ է, որ Ադրբեջանն աջակցություն ստանա ալյանսի կողմից: Ադրբեջանը հուսով է, որ ՆԱՏՕ-ի դերը կմեծանա տարածաշրջանում խաղաղության ու կայունության հաստատման հարցում»:
