Ինձ հակառակորդ համարում եմ ժամանակը. այսօր լրագրողների հետ հանդիպման ժամանակ հայտնեց թիվ 12 ընտրատարածքում մեծամասնական ընտրակարգով պատգամավորության թեկնածու առաջադրված ԲՀԿ անդամ Լյովա Խաչատրյանը՝ խոսելով իր նախընտրական ծրագրերի և պայքարի մասին:
Նա նշեց, որ Արագածոտնի մարզում երկու անգամ եղել է պատգամավոր, փորձել է ինչ-որ բաներ անել իր տարածքի համար:
«Բավականին գործեր արեցի, ջրագծեր, ճանապարհներ կառուցեցի, իհարկե՝ ոչ անձնական միջոցների հաշվին, այլ տարբեր ծրագրերի միջոցով: Այս տարիների ընթացքում ստացվեց իմ աշխատանքը մարզում:
Իմ հիմնական հակառակորդը համարում եմ ժամանակը: Ես «կասկան» գլխիցս չեմ հանել քսան տարի, կարծում եմ՝ կհասցնեմ: Բոլորն արժանի հակառակորդներ են, բայց իմ հիմնական մրցակիցը ժամանակն է, որ հասցնեմ ներկայանալ»,- մեկնաբանեց Լ. Խաչատրյանը՝ հավելելով, որ վերջին հինգ տարում իրեն գյուղում պատգամավոր չեն ասել, այլ ասել են՝ «Մեր Լյովան եկավ»:
Նա տեղեկացրեց, որ առնվազն 60 հազարից ավելի քարոզիչ ունի, որովհետև, նրա խոսքով, իրոք եղել է նրանց խոսնակը կառավարությունում և օրենսդիր մարմնում: Լյովա Խաչատրյանը նշեց, որ թվում էր՝ այս տարիների ընթացքում բավական գործեր արեց, սակայն որքան կառուցեց, այնքան մարդիկ պակասեցին, ուստի հասկացավ, որ առանձին ոլորտ վերցնել և շտկել՝ հնարավոր չէ, այս ճգնաժամից և հիվանդ վիճակից պետք է դուրս գալ:
Ըստ նրա՝ «մարդիկ արտագաղթում են, երկիրը հիվանդ է, մարդիկ կորցնում են տունը, նշանի մատանին»:
Անդրադառնալով մամուլում շրջանառվող հրապարակումներից մեկին՝ Լ. Խաչատրյանն ասաց, որ երբեք տանիք չի ունեցել՝ ունեցել է ընկերներ:
«Այս երկրում ոչ մի կոպեկ փող չեմ աշխատել, այլ ծախսել եմ: Ես այս երկրում ներդրումներ եմ սկսել անել 95 թվականից, երբ մարդիկ չգիտեին, թե փողն ինչ է: ՀՀԿ-ն և ԲՀԿ-ն տանիք չեն»,- նշեց Լ. Խաչատրյանը՝ հավելելով, որ ընտրել է ԲՀԿ-ն և գտնում է, որ անհրաժեշտ է կատարել համակարգային փոփոխություն, որովհետև վերջին չորս տարվա տնտեսական քաղաքականությունը սխալ քաղաքականություն է: