Էրդողանը զգուշացնում է ընտրություններից առաջ քրդերի սադրանքների վերաբերյալ

Թուրքիայի վարչապետ Ռեջեփ Թայիփ Էրդողանը զգուշացրել է երկրի նահանգապետերին, որ ընտրություններից առաջ Քրդստանի աշխատավորական կուսակցությունը կարող է սադրանքներ իրականացնել Թուրքիայի շրջաններում:
Այս մասին Էրդողանը հայտարարել է հինգշաբթի օրն Անկարայում կայացած հանդիպման ժամանակ, որին մասնակցել են երկրի տեղական ինքնակառավարման մարմինների ներկայացուցիչները: Կոչ անելով միանգամից ճնշել ահաբեկչական ցանկացած դրսևորման փորձ՝ Էրդողանը միաժամանակ ասել է, որ քրդական խնդրի լուծումը պետք է լինի ժողովրդավարական քայլերի իրականացմամբ: Ցանկացած դպրոց, հիվանդանոց կամ նոր մայրուղի նվազեցնելու է ահաբեկիչների հնարավորությունը՝ շահարկելու այս խնդիրները:
«Ահաբեկչական կազմակերպությունը, որը տեսնում է, թե իր կողմից պայթեցված տարածքներն ինչպես են ոտքի կանգնում մեկը մյուսի հետևից՝ պարարտ հողը տանելով իրենց ոտքի տակից, ստիպված կլինի ավելացնել սադրանքները»,- նշել է Էրդողանը` կոչ անելով երկրի թե՛ արևմուտքին և թե՛ արևելքին այս քայլերի դեմն առնել՝ հարգելով օրենքի գերակայությունը և ժողովրդավարական սկզբունքները: