Այսօր նախագահ Սերժ Սարգսյանը աշխատանքային այցով և ՀՀԿ քարոզարշավի շրջանակում այցելել է Արարատի մարզ: Հանրապետության ղեկավարն այս պահին Այնթապ համայնքում է, որտեղ ծանոթանում է նոր կառուցվող մանկապարտեզի աշխատանքների ընթացքին և պատասխանատուների հետ քննարկում մանկապարտեզը հնարավորինս շուտ շահագործման հանձնելու հետ կապված խնդիրները` նկատի առնելով, որ համայնքի շուրջ 250 երեխաների մեծ մասը համայնքի վարձած ավտոբուսներով հաճախում են հարևան համայնքների մանկապարտեզներ:
Աշխատանքային այցի շրջանակում նախագահը կլինի «Մանանա գրեյն» ընկերությանը պատկանող Սուրենավանի քարերի մշակման գործարան, որտեղ ընկերությունը կառուցում է վերամշակող արտադրամաս` բնական քարե սալիկներ արտադրելու համար, և նախատեսվում է ապրիլ-մայիս ամիսներին սկսել նոր արտադրամասերի փորձարկումները: Սերժ Սարգսյանը այսօր կլինի նաև «Արարատ գրուպ» հանքային ջրերի գործարանում, որտեղ փորձարկվելու է եվրոպական նորագույն սարքավորումներով համալրված նոր արտադրամասը:
Արտաշատում Սերժ Սարգսյանին կներկայացվի նաև Արտաշատ քաղաքի կենտրոնական թաղամասերից մեկում գտնվող քաղաքային լճակի մաքրման և հարակից տարածքի բարեկարգման աշխատանքների ընթացքը:
Իսկ ՀՀԿ քարոզարշավի ընթացքում ՀՀԿ նախագահը հանդիպումներ կունենա Այնթապի, Մասիսի, Հայանիստի , Ավշարի, Արարատի, Վեդիի և Արտաշատի ընտրողների հետ:
Ի դեպ, նոր կառուցվող շենքի վրա ՀՀԿ կարգախոսն է՝ «ՀՀԿ խոսքը գործ է, իրականցումը` բոլորիս խնդիրը»:
