Սիրիայի իշխանությունները հինգշաբթի` զինադադարի ուժի մեջ մտնելուց հետո կոչ են արել փախստականներին վերադառնալ: Նրանց թիվը ոչ պաշտոնական տվյալների համաձայն՝ կարող է անցնել հարյուր հազարները:
Ընդդիմության և իշխանության միջև ռազմական գործողությունների դադարի մասին համաձայնագիրն ուժի մեջ է մտել հինգշաբթի օրը` տեղական ժամանակով ժամը 06.00-ին:
«Մենք կոչ ենք անում մեր քաղաքացիներին, որոնք ստիպված են եղել լքել իրենց բնակության վայրը և ապաստան գտնել երկրի այլ բնակավայրերում կամ հարևան պետություններում, վերադառնալ իրենց տները»,- ասվում է սիրիական իրավապահ վարչության հայտարարության մեջ:
Սիրիացի փախստականների հարցը մեծ խնդիր է դառնում հարևան երկրների համար:
Թուրքիայի արտգործնախարար Ահմեդ Դավութօղլուն կոչ է արել ՄԱԿ-ին միջամտել, եթե հանկարծ Սիրիայից փախստականների հոսքը մեծ չափեր ստանա:
Վերջին տվյալների համաձայն՝ Թուրքիայում սիրիացի փախստականների թիվը հասել է 24,5 հազար մարդու, որոնք ապրում են վրանային ճամբարներում:
