Ես պաստառներ չեմ փակցնելու, ինձ բոլորն են ճանաչում: Այս մասին «Առաջին լրատվական»-ի հետ զրույցում ասաց թիվ 19 ընտրատարածքում առաջադրված թեկնածու Հակոբ Հակոբյանը` խոսելով նախընտրական քարոզչության շուրջ:
Նա նշեց, որ իրենք ընտրել էին այն ռազմավարությունը, որ ուշ ժամերին գնան քարոզչության և հանդիպեն ընտրողների հետ, որպեսզի վտանգի չենթարկեն նրանց, և որպեսզի նրանք ավելորդ ճնշումների չենթարկվեն և խնդիրներ չունենան իշխանությունների հետ:
«Քարոզարշավի ընթացքում մենք մեր հանդիպումներն ենք շարունակում, և կարելի է ասել, որ դեռևս ստեղծված են հավասար պայմաններ դրա համար: Ես պաստառներ չեմ փակցնելու, որովհետև բոլորն ինձ ճանաչում են, և ես պաստառների կարիք չունեմ: Այս պահին շտաբերն աշխատում են ընտրացուցակների վրա և հենց փաստերով ինչ–որ խախտումներ հայտնաբերենք, կհայտարարենք, քանի որ այս պահին ունենք կասկածներ»,- մեկնաբանեց Հակոբ Հակոբյանը` հավելելով, որ դիտարկում են ամբողջ մարզի կտրվածքով, ոչ միայն թիվ 19-ը ընտրատարածքը:
Հիշեցնենք, որ այս ընտրատարածքում առաջադրված են անկուսակցական Թոռնիկ Գևորգյանը, ՀՀԿ անդամ Հակոբ Վարշամի Հակոբյանը, ՀՀԿ անդամ Սեդրակ Սարոյանը և անկուսակցական Սարգիս Քոչարյանը:
