Սերժ Սարգսյանը երեկ երիտասարդների, բնականաբար՝ ՀՀԿ հավաքագրված երիտասարդների հետ հանդիպմանը փորձել է բացատրել, թե ինչ նկատի ունի հավատանք, որ փոխենք ասելով: Սակայն Սերժ Սարգսյանի բացատրությունը, մեղմ ասած, կարելի է համարել չստացված, որովհետև նա չի բացատրել ամենակարևորը՝ ինչ պետք է փոխել: Թեև հավատալու մասին բացատրությունն էլ, թերևս, դժվար է սպառիչ համարել: Հարցին՝ ո՞ւմ է պետք հավատալ, Սերժ Սարգսյանը պատասխանել է, թե պետք է հավատալ սեփական ուժերին: Իհարկե, պետք է հավատալ սեփական ուժերին, բայց այդ դեպքում ինչո՞ւ է Սերժ Սարգսյանը փոփոխությունից խոսում: Եթե մարդիկ պետք է սեփական ուժերին հավատան, ապա իրենք էլ պետք է որոշեն, թե ինչն է պետք փոխել: Միգուցե մարդիկ ասում են՝ «հավատա, որ չփոխվես»: Չէ՞ որ մարդիկ կարող են և գոհ լինել այն վիճակից, որ կա այժմ: Եթե հավատի օբյեկտը մարդն ինքն է, ապա ինքն էլ թերևս պետք է խոսի փոփոխությունից, ոչ թե Սերժ Սարգսյանը:
Ինչ խոսք, Սերժ Սարգսյանը թերևս լավ հասկացել է իր հռչակած կարգախոսի զավեշտալիությունը և այժմ, բնականաբար, փորձում է ներկայացնել մի իրավիճակ, ըստ որի՝ ինքն ամենևին էլ իրեն հավատալը նկատի չունի: Բայց, ինչպես ասում են, գնացքն արդեն գնացել է, ընդ որում՝ Սերժ Սարգսյանն էլ շարունակում է հրել այդ գնացքը: Բանն այն է՝ եթե նա հայտարարում է, որ մարդիկ իրենք իրենց պետք է հավատան, ապա, բնականաբար, պետք է նաև ասի, որ փոխելու հարցում էլ մարդիկ իրենք պետք է որոշեն, թե ինչն է պետք փոխել: Բայց Սարգսյանը նման բան չի ասում: Մյուս կողմից՝ ասում է նաև, թե պետք է փոխվել աշխարհին համահունչ:
Այսինքն՝ փոփոխությունը որոշելը չի թողնում մարդու վրա, բայց նաև չի մանրամասնում, թե ինքն ինչ նկատի ունի փոփոխություն կամ փոխվել ասելով: Մինչդեռ դա թերևս ամենակարևոր հարցն է, որովհետև այդ հարցն է կոնկրետացնելու կարգախոսը հռչակած անձի և ուժի պատասխանատվությունը: Այսինքն՝ պետք է հստակ ասել, որ այսինչին կամ այսինչ բանը, օրինակ, պետք է փոխել: Որպեսզի հետո էլ հասարակությունն ասի՝ պարոն Սարգսյան, դուք հռչակեցիք, որ այսինչ բանը պետք է փոխել, մինչդեռ դուք չեք արել դրա համար անհրաժեշտ ձեզանից հասանելիք, ձեր իրավասության և լիազորության տիրույթում գտնվող քայլը: Սերժ Սարգսյանը շարունակում է խուսափել դրանից՝ հայտարարելով միայն, թե պետք է փոխվել աշխարհին համընթաց: Իսկ դա շատ վերացական հայտարարություն է, որով փաստորեն ՀՀԿ-ն սկսում է իր նախընտրական քարոզարշավը:
Այսինքն՝ ՀՀԿ քարոզարշավը լինելու է վերացական, կոնկրետությունից հեռու, քանի դեռ հստակ և կոնկրետ գնահատականներով ու անվանումներով չի նշվել, թե ում և ինչն է պետք փոխել մեր երկրում, ինչի համար է պետք փոխել և ինչով է պետք փոխել: Սրանք են կարևոր հարցերը, որոնց Սերժ Սարգսյանը առ այսօր չի պատասխանել: Որովհետև դա այն դեպքն է, երբ պատասխանները առաջին հերթին Սերժ Սարգսյանի դեմ են աշխատելու, քանի որ նա նախագահի պաշտոնում քառամյա աշխատանքի ընթացքում որևէ հիմք չի ստեղծել այդ հարցերին պատասխանելու, այդ պատասխանների կոնկրետ պատասխանատվությունը ստանձնելու համար:
