Հոկեյի ազգային լիգայի պաշտոնական կայքը հաղորդում է, որ կանոնավոր առաջնության ավարտից հետո պարզ են դարձել անհատական երեք ամենահեղինակավոր տիտղոսակիրների անունները:
«Արտ Ռոս» տիտղոսը, որը տրվում է կանոնավոր առաջնության ամենաարդյունավետ խաղացողին (հաշվարկվում է գոլ գումարած արդյունավետ փոխանցում համակարգով), նվաճել է Փիթսբուրգ «Փինգուինս»-ի առաջատար Եվգենի Մալկինը: Ընթացիկ մրցաշրջանի կանոնավոր առաջնության ընթացքում Մալկինը դարձել է 50 գոլի և 59 արդյունավետ փոխանցման հեղինակ` վաստակելով 109 միավոր: 25-ամյա ռուս հոկեյիստն այդ տիտղոսը նվաճել էր նաև 2008/09թթ. մրցաշրջանում, երբ վաստակել էր 113 (35+78) միավոր:
«Մորիս Ռիշար» տիտղոսը նվաճել է Սթիվեն Ստամքոսը: Տիտղոսը տրվում է կանոնավոր առաջնության գլխավոր ռմբարկուին: Տամպա Բեյ «Լայթինգ»-ի առաջատարն ընթացիկ առաջնությունում հեղինակել է 60 տափօղակ: Պատմության ընթացքում մեկ մրցաշրջանի ընթացքում 60 տափօղակ հեղինակել են նաև Ալեքսանդր Օվեչկինը, Մարիո Լեմյեն, Ուեյն Գրեցկին և Յարոմիր Յագրը:
«Ուիլյամ Ջենինգս» տիտղոսը, որը տրվում է կանոնավոր առաջնության ընթացքում առնվազն 25 հանդիպում անցկացրած և ամենաքիչ թվով տափօղակն ընդունած դարպասապահին (դարպասապահներին), նվաճել են Սենտ-Լուիս «Բլյուզ»-ի երկու դարպասապահները` Բրայան Էլիոթը և Յարոսլավ Գալակը: Երկու դարպասապահները միասին 82 խաղում ընդունել են 165 տափօղակ: Բրայան Էլիոթն ակումբի նոր ռեկորդ սահամանեց` 241 րոպե և 33 վայրկյան «մաքուր» խաղ անցկացնելով:
Անհատական բոլոր տիտղոսները մարզիկներին կհանձնվեն հունիսի 20-ին` Լաս-Վեգասում կայանալիք երեկույթի ժամանակ:
