Թունիսի ոստիկանությունը արցունքաբեր գազ է օգտագործել մայրաքաղաքի կենտրոնում ցույցը ցրելու համար: Այս մասին հաղորդում է Agence France-Presse գործակալությունը:
Հարյուրավոր մարդիկ մասնակցել են չթույլատրված մասսայական երթին` բողոքելով նման ակցիաներ անցկացնելու արգելքի դեմ:
Ականատեսների խոսքերով` ոստիկանությունը այնքան մեծ քանակությամբ արցունքաբեր գազ է օգտագործել, որ ցուցարարները ստիպված են եղել կա՛մ թաքնվել խանութներում, կա՛մ էլ փախչել հարակից փողոցներ:
Թունիսը առաջին արաբական պետությունն էր, որտեղ 2011թ-ին հաղթանակել էր ժողովրդավարական հեղափոխությունը, որն ավարտին հասցրեց Զինա ալ- Աբեդին Բեն Ալիի դիկտատուրան:
Դրանից հետո երկրում Սահմանադրական խորհրդի ընտրություններ տեղի ունեցան, որոնք ժողովրդավարական և ազատ են ճանաչվել: Այդ խորհրդի անդամները երկրի ժամանակավոր նախագահ են ընտրել և սկսել են նոր Սահմանադրության ստեղծման աշխատանքները:
