Մայիսի 6-ին կայանալիք խորհրդարանի ընտրություններին ընդառաջ՝ կուսակցությունները Սուրբ Հարության տոնը օգտագործեցին իրենց քարոզարշավի համար:
Հայ ազգային կոնգրեսի՝ Սուրբ Հարության տոնին նվիրված տեսահոլովակն էլ է սկսվում «Պայքար, պայքար մինչև վերջ»-ով և կուսակցության կարգախոսով` «Ոչ մի ձայն ավազակապետությանը»:
Հայաստանի կոմունիստական կուսակցությունը, որի նախընտրական տեսահոլովակից ԽՍՀՄ-ի շունչ է փչում, ետ չի մնում տեխնոլոգիաներից. կոմունիստներն էլ իրենց Youtube-ի Haykomunist ալիքն ունեն, որտեղ զետեղված են կուսակցության առաջնորդ Ռուբեն Թովմասյանի ելույթները: Ներկայացվում են «մութ ու ցուրտ» տարիները` 88-ի հանրահավաքներ, փողոցներում ցախ հավաքողներ, մութ մայրաքաղաք, ապա` ժամանակակից Հայաստան, որտեղ շքեղ մեքենաների ու շինությունների կողքին երևում են աղքատ, հաշմանդամ ու մուրացիկ երեխաներ ու մեծահասակներ` անտարբեր հասարակության կողքին: «Ի՞նչ տեղի ունեցավ Սովետական Միությունից հետո. արժեզրկվեցին գաղափարները, թալանվեց պետությունը, քայքայվեց հզոր տնտեսությունը, երկիրը հայտնվեց խորը ճգնաժամի մեջ: Ի՞նչ էր տիրում Հայաստանում մինչ սովետական կարգերի հաստատումը` ունայնություն, խավար, սով, համաճարակներ: Խորհրդային կարգերից հետո վերածնվեց երկիրը, ծաղկեցին արվեստներն ու արհեստները»,- ասվում է, հետո նվաղած ձայն ենք լսում` «Եվ ի՞նչ ունենք մենք այսօր` կողոպտված մի երկիր, թալանված գործարաններ, աղբանոցներ, սոցիալական անհավասարություն, մուրացկաններ ու անպաշտպան հասարակություն: Երկիրը կանգնած է անդունդի եզրին»: Վերջում «Հայաստանի կոմունիստական կուսակցության հաղթանակը ժողովրդի հաղթանակն է» կարգախոսն է:
Հանրապետական կուսակցությունը տեսահոլովակների թվով գերիշխում է: «Հավատանք, որ փոխենք» կարգախոսով տեսահոլովակում տեսնում ենք. «Մենք սիրում ենք կենտրոնանալ մեր կյանքի ծանրությունների վրա, երբ խոսում ենք երկրի մասին: Բոլորս ենք նույն կերպ վարվում ու հաճախ հասնում ենք «երկիրը երկիր չի» վերջակետին: Մեկ անգամ եկեք այլ կերպ վարվենք, փորձենք խոսել այն Հայաստանի մասին, որն անտեսանելի է թվում, բայց որը կա, այն ստեղծագործ Հայաստանի մասին, այն հպարտ, լուծումներ գտնող Հայաստանի մասին, որն ի վիճակի է պաշտպանվել և արարել»:
«Ժառանգություն»
«Ազատ ընտրեք, արժանապատիվ ընտրեք, ասեք՝ ո՛չ մուրաբային, թունաքիմիկատին, փողին, ադմինիստրատիվ իշխող կուսակցություններին և ասեք` այո՛ հայ մարդուն, հայ քաղաքացուն, հայոց պետությանը, եռագույնին, ընկած տղաներին… Երկիր բարձրացնելու, երեք նախագահներին շնորհակալություն ասելու, բաց նայելու առաջ փոխելու ենք մեր երկիրը»,- «Ժառանգություն» կուսակցության քարոզչական տեսահոլովակից ասում է Րաֆֆի Հովհաննիսյանը, ով կանգնած է Չարենցի կամարի տակ՝ Արարատ լեռան ֆոնին:
Տեսահոլովակի վերջում կուսակցության առաջնորդը հարցնում է. «Գալիս ենք, դուք գալի՞ս եք… Քրիստոս հարյավ ի մեռելոց»:
«Բարգավաճ Հայաստան»-ի քարոզչական տեսանյութը հիմնականում ներկայացնում է ԲՀԿ նախընտրական ծրագրային հիմնադրույթները, Գագիկ Ծառուկյանի՝ ԲՀԿ վերջին համագումարում ելույթի այն հատվածները, որոնք վերաբերում էին արտագաղթին և կրթությանը: Տեսահոլովակը Youtube-ի օգտատերերից 17-ը հավանել են, 12-ը` ոչ:
Facebook-ի օգտատերերը հատկապես ոգևորված են ՕԵԿ-ի վերջին հանրահավաքով. կուսակցության տեսահոլովակը ներկայացվում է շաբաթ օրը Ազատության հրապարակում կայացած հանրահավաքի կադրերով:
Հայաստանի դեմոկրատական կուսակցության ղեկավար Արամ Սարգսյանն էլ կուսակցության տեսահոլովակում շնորհավորում է Սուրբ Հարությունը: Կուսակցության ղեկավար Արամ Սարգսյանն ասում է. «Ես այսօր մտադիր չեմ քարոզ անելու, ես գիտեմ, որ ամեն մի հավատացյալ այսօր խորհուրդ է անում Աստծո հետ: Պետք է ճշմարիտ լինել և ընտրությունը ճիշտ կատարել»:
