Ապրիլի 2-4-ը Բաքվում կայացած Եվրանեսթի Խորհրդարանական վեհաժողովում Ադրբեջանի նախագահ Ալիևի` Հայաստանի պատվիրակությանն ու հայ ժողովրդին ուղղված հայտարարություններից Եվրոպայի Հայ Դատի գրասենյակն անակնկալի չի եկել:
«Եվրոպայի Հայ Դատի գրասենյակը, որ բազմաթիվ անգամներ զգուշացրել է Ադրբեջանի նմանատիպ կեցվածքի մասին, նախատեսում էր Ադրբեջանի նախագահի հայտարարությունները եւ անկարողությունը՝ տեսնելու եւ ընդունելու ներկայիս իրողությունը։ Եւս մեկ անգամ Ալիևը հաստատեց, թե իր երկիրը դեռ որքան երկար ճանապարհ պետք է անցնի` եվրոպական սկզբունքների որոշ մակարդակի հասնելու համար»,- «Ազդակ» օրաթերթի փոխանցմամբ, նշել է Եվրոպայի Հայ Դատի գրասենյակի նախագահ Գասպար Կարապետյանը։
Օրաթերթը ընդգծում է նաև, որ իր անհեթեթ հայտարարություններին հավատարիմ Ալիևին հաջողվեց դժգոհության և լարվածության մթնոլորտ ստեղծել վեհաժողովի մասնակից բոլոր պատվիրակների շրջանում, որոնք Բաքու էին եկել` քննարկելու ժողովրդավարության ամրապնդման, մարդկային իրավունքների պաշտպանության, տնտեսական բարեփոխումների համակարգի ստեղծման հարցեր: «Սակայն պատվիրակները ստիպված եղան ականատես լինել Ադրբեջանի նախագահի ոչ կառուցողական, հարձակողական դիրքավորմանը, հայերին կոչեց ցեղապաշտներ, բռնագրավողներ և գերեզման պղծողներ` ջանալով ապակողմնորոշել ներկաներին»,- գրում է օրաթերթը` մատնանշելով Ադրբեջանի` խոսքի ազատության և ժողովրդավարության առումով երկրի ունեցած ցածր վարկանիշը:
