Աֆղանստանի պաշտպանության նախարար Աբդուլ Ռահիմ Վարդակը և Աֆղանստանում անվտանգությանը նպաստող միջազգային ուժերի զորքերի հրամանատար, ՆԱՏՕ-ի և ԱՄՆ ընդհանուր հրամատարության ներքո գործող գեներալ Ջոն Ալենը կիրակի օրը ստորագրել են փոխըմբռնման հուշագիր` աֆղանական տարածքում տեղի ունեցող հատուկ գործողությունների վերաբերյալ: Ինչպես հաղորդում են աղֆանական ԶԼՄ-ները, ըստ հուշագրի, օտարերկրյա զինվորականները պետք է դադարեցնեն գիշերային ռեյդերը աֆղանցիների տներ:
Այսուհետ Աֆղանստանի բնակավայրերում գիշերային ռեյդերի անցկացումը դառնում է Իսլամական Հանրապետոթւյան անվտանգության ուժերի, մասնավորապես` «կոմանդոսի» ստորաբաժանումների և հատուկ նշանակության զորքերի իրավասությունը:
«Կոմմանդոս» դիվիզիան, որը գործում է աֆղանական ազգային բանակի կազմում, բաղկացած է 9 հազար մարդուց:
Հուշագիրը նախատեսում է աֆղանական կողմի` գիշերային ժամերին գործողություն իրականացնելու վրա վետո դնելու իրավունք:
Աֆղանստանի բնակիչների տներ օտարերկրյա զինվորականների կողմից գիշերային ռեյդերի դադարեցումը գլխավոր պայմաններից մեկը դարձավ, որ առաջ էր քաշվել 2011 թ. աշնանը Քաբուլում տեղի ունեցած համաաֆղանական գերագույն ասամբլեայի կողմից ԱՄՆ-ի հետ երկարաժամկետ ռազմավարական համագործակցության համաձայնագրի ստորագրման համար, երբ որոշվեց մինչև 2014 թ. անվտանգությանը նպաստող միջազգային ռազմական ուժերը և ԱՄՆ բանակը դուրս բերել Աֆղանստանից:
Համաձայնագրի նախագիծը, որի տեքստը դեռ չի հրապարակվել, ենթադրում է աֆղանական տարածքում ռազմական մի շարք բազաների ներկայություն, սակայն ԱՄՆ վարչակազմը հերքում է Աֆղանստանում մշտական ռազմաբազա ունենալու մտադրությունը:
Ինչպես համաձայնագրի ստորագրման նախօրեին հայտարարել է Աֆղանստանի պաշտպանության նախարար Աբդուլ Ռահիմ Վարդակը, աֆղանական անվտանգության ուժերը ծանոթ են տեղական սովորույթներին ու ավանդույթներին, այդ իսկ պատճառով ռեյդերը զայրույթ, սարսափ և բողոք չեն առաջացնի տեղացիների շրջանում:
