«Ես ուզում եմ, որ Գագիկ Բեգլարյանը հետ գա, քիչ ա արել, որ մեկին ա ծեծել, պիտի մի քանի ղարաբաղցու ծեծեր, որ էդ լոխերը ըստեղից գնան, հերիք ա, էլ չենք կարողանում ապրել: Մենք լավ էլ հասկանում ենք, թե ինչ են ուզում սրանով անել: Գագիկ Բեգլարյանի ժամանակ, ճիշտ է, նման որոշում կար, բայց էդ մարդը տեսավ ժողովրդի վիճակը և թույլ տվեց, որ աշխատենք, էս ղարաբաղցին ինչ ա ուզում, որ սոված մեռնե՞նք, որ նորից «Նաիրի Հունանյան» լինի՞, դրան են տանում, ծնողը հանուն իր սոված երեխայի ամեն ինչի ընդունակ է»,-«Առաջին լրատվական»-ին իրենց վրդովմունքը հայտնեցին քաղաքապետարանի դիմաց հավաքված, արդեն 3 օր անգործ մնացած փողոցային առևտրով զբաղվող քաղաքացիները:
55-ամյա Հովհաննիսյան Գայանեն 13 տարի է, ինչ Տիգրան Մեծի փողոցում կիտրոն է վաճառում, և այսօր քաղաքապետի որոշումը Գայանեին զրկում է իր միակ վաստակից, որով իր ընտանիքի երկու հիվանդ անդամներին է պահում. «Ես այսօր այստեղ եմ և պահանջում եմ թե’ քաղաքապետից, թե’ նախագահից, որ թույլ տան մեր հացի փողը աշխատենք, թող էդ էլիտար շենքերի փոխարեն, երկու-երեք գործարան բացեն, ես էլ կգնամ կաշխատեմ, ոչ թե փողոցում նստած, ցուրտ եղանակին լիմոն կվաճառեմ, որ կարողանամ ընտանիքիս կարիքները հոգալ»:
«Ես վարձով եմ մնում, երկու հատ էլ երեխա ունեմ, փողոցում առևտուր անելով եմ կարողանում իմ ընտանիքը պահել, ոնց անեմ, թող քաղաքապետը իր ստացած աշխատավարձի կեսը տա, ես էլ կապրեմ, փողոցում էլ չեմ կանգնի: Թուրքը, որ թուրք ա հազարավոր հայերի ա պահում, 70 հայ ենք եկել, թող թողնեն աշխատենք էլի: Եթե ինքը օրենք ա հանում, չի նշանակում, որ մեծարգո քաղաքապետ ա ու շատ ավելի խելացի ա, քան այստեղ հավաքված մարդիկ: Էս մարդիկ մեղավոր չեն, որ զբաղվում են փողոցային առևտրով, կյանքն է իրենց ստիպել: Եթե շարունակեն այսպես, հնարավոր է, որ սոցիալական բունտ լինի»,- նշեց 26-ամյա Արամը:
Աշխատանքից զրկված երևանցիներն ասացին, որ ամեն օր հավաքվելու են քաղաքապետարանի մոտ, իսկ վաղը նույնիսկ գնալու են նախագահի նստավայրի մոտ, որպեսզի իրենց ձայնն ավելի լսելի դառնա. «Մենք ամեն օր գալու ենք քաղաքապետարանի մոտ, եթե հարկ լինի նստացույց, հացադուլ էլ կհայտարարենք, կգնանք նախագահականի մոտ, կգնանք դեսպանատների առաջ կկանգնենք, մինչև այս հարցը լուծվի»:
