Այս տարի խնձորը Հայաստանում արքայական գներ է ձեռք բերել։ Մրգերի երկիր Հայաստանում 1 կգ խնձորը վաճառվում է 1000-1500 դրամով, ինչը բնակչության շրջանում դժգոհության պատճառ է դարձել։ Շատերը նույնիսկ կատակում են, թե մարդիկ գնալով իրենց գինը գցում են, իսկ խնձորի գինը բարձրանում է։ Ավելին, նկատում են, թե Ռուսաստանում հիմա կարմիր խնձոր գտնելն ավելի հեշտ է, քան Հայաստանում խնձոր գնելը։ Այսօր գյուղնախարարության բուսաբուծության վարչության պետ Գագիկ Մանուչարյանից փորձեցինք պարզել, թե ինչով են պայմանավորված այս թանկացումները։ «Նախ ցանկանում եմ ասել, որ մեր հանրապետությունը պտղի տեսանկյունից ինքնաբավ հանրապետություն է։ Թեև անցյալ տարվա եղանակը նկատելի հարված հասցրեց, սակայն որոշ չափով կարողանում ենք մեր ինքնաբավությունը ապահովել։ Այնուամենայնիվ, բնության մատուցած անակնկալների արդյունքում կորցրինք խնձորը, վաղ գարնանային ցրտահարությունների հետևանքով կորցրինք նաև ծիրանը, բայց դա ամեն տարի չէ։ Հետևաբար, տվյալ մրգերը սկսեցին թանկ գնով վաճառել»,- պարզաբանեց բուսաբուծության վարչության պետը։ Դա նաև նպաստեց, որ ներկրման ծավալները մեծանան։ «Եթե հիշում եք, անցյալ բոլոր տարիներին խնձորը 300 դրամով էր վաճառվում։ Ավելին, ունեինք ավելի լավ պահպանված խնձոր։ Ստեղծված իրավիճակը բերքատվության անկման հետևանք է։ Բացի այդ, վաղ գարնանային ցրտահարությունների հետևանքով կորցրինք դեղձի և սալորի մի մասը։ Իսկ խնձորի ծաղկման ընթացքում հաճախակի անձրևներ տեղացին, և ծաղիկը չբռնեց, չպտղակալեց , պտուղ չդարձավ։ Այդ պատճառով էլ բերքի կորուստ ունեցանք»,- պարզաբանեց Գագիկ Մանուչարյանը և ավելացրեց, որ, ընդհանուր առմամբ, մենք մեր ինքնաբավությունը ապահովում ենք։