ՀՀ Վարչական դատարանը կրկին մերժել է Խաչատուր Սուքիասյանի հայցը, այս անգամ Կենտրոնական ընտրական հանձնաժողովի դեմ:
Սուքիասյանն այս անգամ հայց էր ներկայացրել ԿԸՀ-ի դեմ և պահանջում էր անվավեր ճանաչել այն որոշումը, որով նրան չեն ընդգրկել «Հայ Ազգային Կոնգրես» կուսակցությունների դաշինքի համամասնական ցուցակում։
Դռնբաց դատական նիստում դատավորների հնգյակը (Ռ. Սարգսյան, Ա. Ղազարյան, Ա. Ծատուրյան, Ս. Հովակիմյան, Ա. Դարբինյան) քննել է «վարչական գործն ըստ հայցի` Խաչատուր Սուքիասյանի ընդդեմ Հայաստանի Հանրապետության կենտրոնական ընտրական հանձնաժողովի, երրորդ անձ «Հայ Ազգային Կոնգրես» կուսակցությունների դաշինք` Հայաստանի Հանրապետության կենտրոնական ընտրական հանձնաժողովի 01.04.2012թ. թիվ 84-Ա որոշումն անվավեր ճանաչելու պահանջի մասին, որոշեց մերժել»:
Որոշումն ուժի մեջ է մտնում հրապարակման պահից, վերջնական է և ենթակա չէ վերանայման:
Հիշեցնենք, որ ապրիլի 4-ին էլ վարչական դատարանը մերժել էր Խաչատուր Սուքիասյանի հայցն ընդդեմ թիվ 10 ընտրատարածքային ընտրական հանձնաժողովի:
Երկու հանձնաժողովներն էլ մերժել էին Սուքիասյանի գրանցումը` որպես հիմնավորում ներկայացնելով ոստիկանության անձնագրային և վիզաների վարչության որոշումը, ըստ որի Սուքիասյանը վերջին 5 տարում մշտապես չի բնակվել Հայաստանում:
