ՀՀԿ-ն չստորագրեց ընտրությունների վերահսկողության միասնական ընտրական շտաբ ստեղծելու՝ ՀԱԿ-ի, ՀՅԴ-ի, ԲՀԿ-ի և «Ժառանգության» երեկվա հայտարարությունը, քանի որ նրան բացարձակապես պետք չէ, որ առաջիկա ընտրությունները քիչ թե շատ վերահսկելի լինեն. «Առաջին լրատվական»-ի հետ զրույցում այս մասին ասաց Սոցիալ-դեմոկրատ հնչակյան կուսակցության ատենապետ Լյուդմիլա Սարգսյանը:
«Հայտարարությանը չի միացել հինգերորդ գումարման Ազգային ժողովի ընտրություններին մասնակցող հիմնական քաղաքական ուժերից միայն ՀՀԿ-ն: Այդ կապակցությամբ ուզում եմ հարցնել Դավիթ Հարությունյանին՝ իսկ ո՞վ է մեղավոր, որ չի միացել: Իհարկե, պարզ է, որ ՀՀԿ-ն ունի իր ծրագրերն ու մշակած պլանը, հետևաբար չի կարող միանալ այս նախաձեռնությանը»,- նշեց ՍԴՀԿ ատենապետը:
Հիշեցնենք, որ խորհրդարանական ընտրություններին մասնակից 4 քաղաքական ուժեր՝ Հայ ազգային կոնգրեսը, Դաշնակցությունը, «Ժառանգություն»-ը և «Բարգավաճ Հայաստան»-ը, օրերս ստորագրել են ընտրությունների վերահսկման միասնական շտաբ ստեղծելու մասին հայտարարություն, որին չի միացել միայն համատեղ քննարկմանը մասնակցած ՀՀԿ-ն:
Հիշեցնենք, որ ՀՀԿ գործադիր մարմնի անդամ Դավիթ Հարությունյանը երեկ հանդես էր եկել հայտարարությամբ՝ կապված քաղաքական ուժերի կողմից ընտրությունների հանրային վերահսկողության միջկուսակցական միասնական ընտրական շտաբ ստեղծելու հետ:
Նա, մասնավորապես, հայտարարության մեջ նշել էր, որ ընտրությունների հանրային վերահսկողության միջկուսակցական միասնական ընտրական շտաբի գաղափարն ինքնին լավն է, սակայն ցավում է, որ պատշաճ նախապատրաստված չլինելու պատճառով այն արդյունքում ստորագրվեց ընտրությունների մասնակցող ինը կուսակցություններից ընդամենը չորսի կողմից:
<Եկե՜ք բոլորս միասին կանգնենք մեջք մեջքի լավ ընտրությունների անցկացման հարցում ու իրականացնենք նման ընտրություններ: Եկե՜ք կարևոր այս գործընթացը չդարձնենք «փիառ» ակցիա, այլ ներգրավենք իսկապես բոլորին, պայմանավորվենք բոլոր հարցերի շուրջ մեկ փաթեթով, պայմանավորվենք թե՜ ընտրությունների հանրային վերահսկողության մեխանիզմների, թե՜ ընտրությունների ընթացքում յուրաքանչյուրիս վարքականոնների, թե՜ փոխադարձ հարգանքի և թե՜ արդար մրցակցության ապահովման շուրջ>,- ասել էր Դավիթ Հարությունյանը:
