«Ժառանգություն» կուսակցությունն առայժմ ձեռնպահ է մնում մեկնաբանել ՀՀԿ գործադիր մարմնի անդամ, ԱԺ պետաիրավական հարցերի մշտական հանձնաժողովի նախագահ Դավիթ Հարությունյանի հայտարարությունը՝ կապված 4 քաղաքական ուժերի կողմից ընտրությունների վերահսկողության միասնական ընտրական շտաբ ստեղծելու հետ:
«Առաջին լրատվական»-ի հետ զրույցում այս մասին ասաց «Ժառանգության» պատգամավոր Արմեն Մարտիրոսյանը:
Նրա տեղեկացմամբ՝ Հարությունյանի հայտարարությանը «Ժառանգությունը» կպատասխանի երկուշաբթի՝ կուսակցության խորհրդում ծավալվելիք քննարկումներից հետո միայն:
Հիշեցնենք, որ ՀՀԿ գործադիր մարմնի անդամ Դավիթ Հարությունյանը երեկ հանդես էր եկել հայտարարությամբ՝ կապված քաղաքական ուժերի կողմից ընտրությունների հանրային վերահսկողության միջկուսակցական միասնական ընտրական շտաբ ստեղծելու հետ:
Հայտարարության մեջ նա մասնավորապես նշել էր, որ ընտրությունների հանրային վերահսկողության միջկուսակցական միասնական ընտրական շտաբի գաղափարն ինքնին լավն է, սակայն ցավում է, որ պատշաճ նախապատրաստված չլինելու պատճառով այն արդյունքում ստորագրվեց ընտրություններին մասնակցող ինը կուսակցություններից ընդամենը չորսի կողմից:
«Եկե՛ք բոլորս միասին կանգնենք մեջք մեջքի լավ ընտրությունների անցկացման հարցում և իրականացնենք նման ընտրություններ: Եկե՛ք կարևոր այս գործընթացը չդարձնենք «փիառ» ակցիա, այլ ներգրավենք իսկապես բոլորին, պայմանավորվենք բոլոր հարցերի շուրջ մեկ փաթեթով, պայմանավորվենք թե՛ ընտրությունների հանրային վերահսկողության մեխանիզմների, թե՛ ընտրությունների ընթացքում յուրաքանչյուրիս վարքականոնների, թե՛ փոխադարձ հարգանքի և թե՛ արդար մրցակցության ապահովման շուրջ»,- ասել էր Դավիթ Հարությունյանը:
