Երևանի Աջափնյակ և Դավթաշեն վարչական շրջանների ընդհանուր իրավասության դատարանում շարունակվում է «Նորաշեն 2007»-ի գործով դատաքննությունը, որով, ինչպես «Առաջին լրատվական»-ն արդեն հայտնել է, «Նորաշեն 2007»-ից խաբված շուրջ 200 բնակարանատերերի գործերը քննվում են անջատ, քանի որ դատարանը որոշել է ընդհանուր քննությունից անջատել Լուսաբեկ Սամվելյանի և Արմեն Թադևոսյանի գործերը:
Այնպես որ, դատարանն այսօր ևս շարունակել է լսել միայն նշված երկու ամբաստանյալների գործողությունների արդյունքում տուժած քաղաքացիներին:
Այսօրվա նիստում հարցաքննվել են ծանուցված բոլոր 10 տուժողները, որոնց մեծ մասն այս պահին ունի բնակարանի սեփականության վկայական և այլևս պարտք ու պահանջ չունի դատարանի հետ, սակայն վկայի կարգավիճակով ներկայացել է հարցաքննության:
Հետաքրքիրն այն է, որ այս երկու ամբաստանյալներից տուժած անձանց մեծ մասը, համենայնդեպս նրանք, ովքեր մինչ օրս ներկայացել են դատարան, համոզված են, որ Արմեն Թադևոսյանը և Լուսաբեկ Սամվելյանը ստեղծված իրավիճակում ընդամենը զոհեր են, որոնց թիկունքում ավելի մեծ «շնաձկները» կկարողանան թաքնվել ու դատական այս պրոցեսի երկարաձգման արդյունքում կհասցնեն յուրացնել ավարը:
Հիշեցնենք, որ մինչդատական վարույթում ձեռք բերված ապացույցների հիման վրա կոոպերատիվի նախագահ Ա. Թադևոսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 205-րդ հոդվածի 2-րդ մասով, Լ. Սամվելյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով, Ա. Մարտիրոսյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով և 213-րդ հոդվածի 2-րդ մասի 1-ին և 2-րդ կետերով, Ց. Պետրոսյանին՝ ՀՀ քրեական օրենսգրքի 38-178-րդ հոդվածի 3-րդ մասի 1-ին կետով, իսկ Վ. Օհանյանին և Դ. Երեմյանին՝ ՀՀ քրեական օրենսգրքի 213-րդ հոդվածի 2-րդ մասի 1-ին և 2-րդ կետերով:
Արմեն Թադևոսյանին մեղադրանք է առաջադրվել այն բանի համար, որ հանդիսանալով «Նորաշեն 2007» սպառողական կոոպերատիվի նախագահ, գործընկերոջ Լուսաբեկ Սամվելյանի հետ ունեցած պայմանավորվածության համաձայն, նույն կոոպերատիվի կողմից կառուցվող բազմաբնակարան շենքում բնակարաններ վաճառելու պատրվակով 2007-2011թթ. ընթացքում բազմաթիվ քաղաքացիների վստահությունը չարաշահելով, նրանց հետ կնքել են բնակարանների նախնական առուվաճառքի և նախավճարի պայմանագրեր, գանձել են 1.843.379.449 դրամ առանձնապես խոշոր չափի գումար, այն հափշտակել, իսկ բնակարանները հետագայում իրացրել այլ անձանց, իսկ Ցոլակ Պետրոսյանը կազմակերպել ու ղեկավարել է Ա. Թադևոսյանի և Լ. Սամվելյանի կողմից խարդախությամբ մի շարք անձանց առանձնապես խոշոր չափի գույքի հափշտակությունը:
