Հայաստանի բարձր գնաճի հիմնական պատճառը իշխանությունների վարած ապաշնորհ տնտեսական քաղաքականությունն է: Այս մասին այսօր ԱԺ աշխատանքի և սոցիալական հարցերի մշտական հանձնաժողովի նախագահ Հակոբ Հակոբյանի հետ բանավեճի ժամանական ասաց ԿԲ նախկին նախագահ Բագրատ Ասատրյանը: Ըստ նրա` միջազգային շուկայում որոշ ապրանքատեսակների գների աճը ևս ազդել է մեր երկրում գների աճի վրա, սակայն այդ ազդեցությունը չի եղել մեր բարձր գնաճի հիմնական պատճառը: Որպես փաստարկ` Բ. Ասատրյանը նշեց այն, որ միջազգային շուկաներում գների աճը պետք է հանգեցներ նաև այլ երկրներում գների բարձր աճի, սակայն նման բան չի եղել: Հայաստանը այլ երկրների համեմատ շատ բարձր գնաճ է արձանագրել 2010-ին` 9.4%, որով մտել է աշխարհի ամենաբարձր գնաճ արձանագրած երկրների տասնյակ: Նման բան սկսած 90-ականներից, ըստ Բ. Ասատրյանի, դեռ երբեք չէր եղել: Այսինքն, ըստ Բ. Ասատրյանի, Հայաստանի գնաճի հիմնական պատճառը «մոնոպոլացված օլիգարխիկ կոռումպացված համակարգն է»: Եվ այս իշխանությունների պայմաններում 2011-ին ևս ըստ Բ. Ասատրյանի, մեզ բարձր գնաճ է սպասվում: «Այս իշխանությունների մնալու դեպքում 2011-ին ևս մեզ լավ բաներ չեն սպասվում»,- եզրափակեց Բ. Ասատրյանը
