«Ժառանգությունը» Դաշնակցության հետ պայմանավորվածություն չունի. այսօր լրագրողների հետ հանդիպման ժամանակ հայտարարեց «Ժառանգություն» կուսակցության առաջնորդ Րաֆֆի Հովհաննիսյանը՝ անդրադառնալով շրջանառվող այն լուրերին, թե ՀՅԴ-ն և «Ժառանգությունն» օրերս հանդիպել են:
Բանախոսը նշեց, որ հարգում է բոլորին, անգամ նրանց, ովքեր լրատվությամբ չեն զբաղվում, իսկ լրատվությունը իրենից ենթադրում է գույների ողջ պատկեր: Սակայն ըստ նրա՝ բոլոր նման լուրերը հերյուրանքներ են:
«Դաշնակցության հետ որևէ պայմանավորվածություն չունենք, այն մեր խորհրդարանական գործընկերն է, որոշ հարցերի շուրջ ունենք միանման տեսակետներ, կարծում եմ՝ հետընտրական շրջանում կհամագործակցենք»,- նկատեց Ր. Հովհաննիսյանը:
Անդրադառնալով Գորիսում «Ժառանգություն» կուսակցության շտաբի ձևավորման խնդիրներին՝ նա նշեց, որ «Գորիսը վախահան է լինում», և այդ շտաբը վերականգնվեց:
«Ուրախ եմ, որ հարցը լուծվել է: Ես տեսնում եմ, թե ցուցակագրումն ինչպես է լինում, և ինչպես են անվտանգության աշխատակիցները մտնում իշխող կոալիցիա, սակայն նրանք պետք է դուրս լինեն կուսակցական շտաբներից, պետք է նման երևույթները բացառել: Թող մեր անվտանգության մարմինները զբաղվեն իրական գործերով»,- նկատեց Ր. Հովհաննիսյանը:
Խոսելով ՀԱԿ-«Ժառանգություն» լարվածության մասին՝ նա քաղաքական դաշտում այդ գործընթացները բնական երևույթներ համարեց:
«Միասնական փաստաթուղթը ստորագրվեց չորս քաղաքական ուժերի միջև, այդ թվում նաև՝ ՀԱԿ-ի և «ժառանգության»»,- նկատեց բանախոսը՝ հույս հայտնելով, որ սա կլինի մի փաստաթուղթ, որը հնարավորություն կընձեռի ՀԱԿ-ի հետ նորմալ աշխատակարգը շարունակել: Ըստ նրա՝ ոչ այնքան կարևոր են երկկողմանի հարաբերությունները, որքան դաշտի կարգավորումը:
