Թունիսի դատարանը յոթ տարվա ազատազրկման է դատապարտել երկու երիտասարդների` Facebook սոցիալական կայքում Մուհամմեդ մարգարեի մերկ ծաղրանկարների տեղադրման համար: Այս մասին հաղորդել է Newsru Israel-ը` հղում անելով արդարադատության նախարարությանը:
Դատապարտյալները կայքում տեղադրել էին մերկ մարգարեի, ինչպես նաև՝ Թունիսի մի շարք բարձրաստիճան անձնաց ծաղրանկարներ: Թունիսի իրավապահ մարմինները Մուհամմեդ մարգարեի ծաղրանկարը որակել են որպես «անբարո քայլ, հասարակական կարգի խախտում և վիրավորանք»:
Tunisia Live կայքը հրապարակել է հավելյալ տեղեկություններ աստվածանարգության գործի վերաբերյալ, մասնավորապես՝ հայտնվել են դատապարտյալների անունները` Ռազի Բեջի և անգլերենի ուսուցիչ Ջաբեր Մեջրի: Նրանք երկուսն էլ Մահդիա քաղաքից են, որը երկրի մայրաքաղաքից 200 կմ հեռավորության վրա է գտնվում: Մեջրին բանտ է ընկել, իսկ Բեջին հասցրել է լքել Թունիսը և հաստատվել Հունաստանում, որտեղ երկրի իշխանություններին խնդրել է քաղաքական ապաստարան տրամադրել իրեն:
Կայքի տեղեկատվության համաձայն՝ նրանք հրապարակել են ոչ միայն ծաղրանկարներ, այլ նաև իսլամը քննադատող գրքեր: Բեջին ասել է, որ, լինելով աթեիստ, որոշել է հրատարակել գիրք այն մասին, թե ինչպես է Մուհամմեդ մարգարեն կնության առել վեցամյա Աիշային, ինչպես նաև գրքում նա շոշափել է իսլամի որոշ վիճելի պահեր` հույս ունենալով, որ հեղափոխական Թունիսը դարձել է ազատ և ժողովրդավարական պետություն: