ԱՄՆ պետքարտուղար Հիլարի Քլինթոնը ողջունել է ԵՄ որոշումը՝ ուսումնասիրել Կոսովոյի ինքնահռչակ հանրապետության հետ համաձայնագրեր կնքելու հնարավորության հարցը:
«Ես կցանկանայի ողջունել ԵՄ-ին այդ որոշման կապակցությամբ: Դա վկայում է այն մասին, որ առաջընթաց է գրանցվել Կոսովոյի՝ ԵՄ-ին միանալու գործում։ Որոշումը վկայությունն է նաև այն բանի, որ թե՛ Կոսովոյի, թե՛ Սերբիայի ղեկավարությունը հակված է ամրապնդել այդ հարաբերությունները»,- Interfax-ի փոխանցմամբ՝ ասել է Քլինթոնը:
Նրա խոսքերով՝ «անկախ Կոսովոն պատրաստ է միջազգային հանրության շրջանակներում լիարժեք մասնակցության և գործընկերության»:
Հիշեցնենք, որ մարտի 2-ին ԵՄ 27 երկրների առաջնորդները Բրյուսելի գագաթնաժողովում որոշեցին Սերբիային տրամադրել ԵՄ անդամի թեկնածուի կարգավիճակ:
Նշենք, որ ավելի վաղ ԱՄՆ պետքարտուղար Հիլարի Քլինթոնը հայտարարել էր, որ միջազգային թատերաբեմում Կոսովոյի ներկայության մասին նոր պայմանագիրը կօգնի Սերբիային մուտք գործել Եվրամիություն: