Երևանի թիվ 7 ընտրատարածքում Սամվել Ալեքսանյանի և Նիկոլ Փաշինյանի հետ առաջադրված անկուսակցական Վարդան Վարդանյանը «Առաջին լրատվական»-ի հետ զրույցում ասաց՝ վստահ է, որ առաջիկա խորհրդարանական ընտրությունների մրցապայքարում հենց ինքն է հաղթելու:
Հարցին՝ մրցակիցներից ո՞ւմ է ավելի ուժեղ համարում, Վարդանյանը պատասխանեց՝ ՀՀԿ-ի կողմից առաջադրված, անկուսակցական Սամվել Ալեքսանյանին:
«Նա ուժեղ է իր մարդասիրական կողմերով, գործարար լինելով, բարերարությամբ: Սրանք բոլորը ինչ-որ տեղ ուժ են տալիս թեկնածուին: Իսկ ՀԱԿ անդամ Նիկոլ Փաշինյանը թույլ է: Ճիշտ է, նա քաղաքական դեմք է, բայց դա ոչ մի նշանակություն չունի: Նա, միևնույն է, թույլ է»,- ասաց պատգամավորության թեկնածուն:
Հետաքրքրվեցինք՝ ինչո՞վ է ուժեղ ինքը՝ Վարդան Վարդանյանը: «Ինչ բնակվում եմ Մալաթիա-Սեբաստիա վարչական շրջանում, կյանքիս 20 տարիները ներդրել եմ համայնքի բարգավաճման, զարգացման, առաջընթացի համար, և վստահ եմ, որ բնակիչներն իրենց վստահության քվեն ինձ կտան»,- ասաց Վարդանյանը:
Ամփոփելով՝ պատգամավորության անկուսակցական թեկնածուն նշեց, որ իր մրցակիցներին հրավիրում է հեռուստաբանավեճի և պատրաստ է նրանց հետ քննարկել ցանկացած հարց: