Ամերիկայի Հայ Դատի հանձնախմբի (ANCA) կայքի փոխանցմամբ` ԱՄՆ պետքարտուղար Հիլարի Քլինթոնը պատասխանել է Կալիֆոռնիայից ընտրված դեմոկրատ կոնգրեսական Հովարդ Բերմանի հարցերին, որոնցից մեկն առնչվել է Ղարաբաղյան հակամարտության կարգավորմանը.
«Մենք ցավում ենք, որ շփման գծում շարունակվում է մարդկային զոհերի գրանցումը, և նախկինի նման հակամարտող կողմերին կոչ ենք անում քայլեր ձեռնարկել, այդ թվում նաև՝ դիպուկահարներին հետ քաշել շփման գծից, բանակցությունների մթնոլորտի բարելավման ուղղությամբ՝ ոչ անհրաժեշտ կորուստներից խուսափելու ու հրադադարի համաձայնագրի պահպանումն ամրապնդելու համար:
ԱՄՆ-ը՝ որպես ԵԱՀԿ Մինսկի խմբի համանախագահ, նախկինի նման խորապես հավատարիմ է հակամարտող կողմերին հակամարտության խաղաղ և ամուր կարգավորմանը հասնելու հարցում օգնություն ցուցաբերելուն: Հակամարտող կողմերը անկանխատեսելի հետևանքներից զերծ մնալու համար պետք է զսպվածություն դրսևորեն իրենց հրապարակային հայտարարություններում:
Մենք նորից հայտարարում ենք, որ գոյություն չունի հակամարտության ռազմական կարգավորում, և միայն դրա խաղաղ կարգավորումը կհանգեցնի տարածաշրջանի անվտանգությանը, կայունությանն ու հաշտեցմանը»:
