Գվատեմալայի նախագահ Օտտո Պերես Մոլինան պատրաստվում է ԱՄՆ նախագահ Բարաք Օբամայի հետ անձնական հանդիպման ընթացքում քննարկել թմրանյութերի օրինականացման հարցը՝ որպես դրանց շրջանառության և դրանից եկող հանցավորության հետ կապված խնդիրը լուծելու հնարավոր տարբերակ: Այս մասին հաղորդում է RIA Novosti-ն՝ վկայակոչելով Univision հեռուստաալիքին:
2011 թ. նոյեմբերին ընտրություններում հաղթելուց հետո նախկին զինվորական Պերես Մոլինան բազմիցս հայտարարել է թմրանյութերի օրինականացման անհրաժեշտության մասին: Փետրվարի կեսերին նա հայտարարեց, որ Գվատեմալան ինքնուրույն, առանց ԱՄՆ խորհուրդների, կքննարկի նման որոշում կայացնելու հնարավորությունը, իսկ հետո մեղադրեց ԱՄՆ-ին, որ վերջինս ճնշում է գործադրում Կենտրոնական Ամերիկայի մի շարք երկրների վրա, որպեսզի նրանք չմասնակցեն տարածաշրջանի երկրների՝ թմրանյութերի դեմ պայքարի գագաթնաժողովներին:
«Այժմ միջոցներ են ձեռնարկվում, որպեսզի «Ամերիկաների գագաթնաժողով»-ի շրջանակներում նման երկկողմ հանդիպում տեղի ունենա»,- ասել է Պերես Մոլինան: Բարձր մակարդակով այդ տարածաշրջանային հանդիպումը տեղի կունենա ապրիլի 14-15-ը Կոլումբիայի Կարտախենա դե Ինդիաս քաղաքում:
«Անհրաժեշտ է երկխոսություն սկսել անգամ այն երկրների հետ, որոնք այժմ դեմ են հանդես գալիս մեր առաջարկին»,- ասել է Գվատեմալայի նախագահը: Բացի ԱՄՆ նախագահից՝ Պերես Մոլինան պատրաստվում է երկկողմ հանդիպումներ անցկացնել Կոլումբիայի, Մեքսիկայի և Պերուի իր գործընկերների հետ:
