Ղրղըզստանի համար Ռուսաստանը ռազմավարական գործընկեր է: Ինչպես հաղորդում է CA-News-ը, այս մասին այսօր հայտարարել է Ղրղըզստանի նախագահ Ալմազբեկ Ատամբաևը` ընդունելով ՌԴ պատվիրակությանը` ԱԳ նախարար Սերգեյ Լավրովի գլխավորությամբ:
Ռուսական պատվիրակության այցը կատարվում է երկու երկրների միջև դիվանագիտական հարաբերությունների հաստատման 20-ամյակի շրջանակում:
Ողջունելով բարձրաստիճան հյուրին` պետության ղեկավարը հույս է հայտնել, որ նրա այցը «նոր խթան կհանդիսանա երկկողմանի հարաբերությունների համար»:
«Ռուսաստանը Ղրղըզստանի համար ռազմավարական գործընկեր է: Եվ, իհարկե, տոն է, քանի որ մի կողմից` նշում ենք երկկողմանի հարաբերությունների 20-ամյակը, մյուս կողմից` հիշում, որ ինչ-որ մի ժամանակ եղել ենք մեկ երկրի քաղաքացիներ: Հարաբերությունները, շփումները եղել են ավելի ոչ պաշտոնական, եղբայրական: Հուսով եմ, Ձեր այցի ընթացքում մենք կքննարկենք շատ հարցեր, և մեր հարաբերությունները կդառնան ավելի մտերիմ, ավելի ընկերական, քանի որ Ղրղըզստանին ու Ռուսաստնանին շատ բան է կապում»,- ասել է Ղրղըզստանի նախագահը:
Նա նաև նկատել է, որ երկու երկրների ժողովուրդներին միավորում է հազարամյա պատմությունը:
«Դա ընդհանուր արմատներն են, եթե կուզեք, նաև արյունակցական բարեկամությունը: Մեր հայրերն ու պապերը միասին կռվել են մեկ Հայրենիքի` Խորհրդային Միության համար»,- հավելել է վերջինս` դրա հետ միասին ընդգծելով, որ ներկայումս անհնար է վերակենդանացնել ԽՍՀՄ-ը, սակայն հնարավոր է այնպես անել, որ երկու երկրները գտնվեն տնտեսակական մեկ տիրույթում:
