ԱՄՆ իշխանությունները որոշում են ընդունել թուլացնել Մյանմարի դեմ գործող պատժամիջոցներն այն բանից հետո, երբ այդ երկրում անցկացված խորհրդարանական լրացուցիչ ընտրությունների ժամանակ բացահայտ առավելությամբ հաղթել է երկրի ընդդիմությունը: Այս մասին հաղորդում է Reiters գործակալությունը` հղում կատարելով պետքարտուղար Հիլարի Քլինթոնի հայտարարությանը:
Քլինթոնը հայտարարել է, որ ԱՄՆ պատրաստվում է քայլ առ քայլ վերականգնել դիվանագիտական հարաբերությունները Մյանմարի հետ, վերջին 20 տարվա մեջ առաջին անգամ այդ երկրում կնշանակվի ԱՄՆ դեսպան, իսկ Մյանմարի որոշ պաշտոնյաների թույլ կտան մուտք գործել ԱՄՆ տարածք:
Նշվում է, որ ամերիկյան ընկերություններին թույլ կտան ներդրումներ կատարել Մյանմարի տնտեսության մեջ, ինչպես նաև ֆինանսական ծառայություններ մատուցել այդ պետությանն ԱՄՆ տարածքում: Ըստ որոշ աղբյուրների` ամերիկյան ներդրումները կկատարվեն գյուղատնտեսության, զբոսաշրջության, հեռահաղորդակցության և բանկային ոլորտներում: Սակայն նույն աղբյուրները նշում են, որ այս կետերը դեռ քննարկվում են, և հստակ որոշումներ չկան:
Հիշեցնենք. ապրիլի 1-ին Մյանմարում 664 տեղ ունեցող խորհրդարանում ընտրել են 45 նոր անդամի: Ընդդիմադիր Աուն Սան Սու Չժիի «Ազգային ժողովրդավարական լիգան» 1990 թվականից հետո առաջին անգամ է տեղ գտել խորհրդարանում: Նրա թեկնածուները ստացել են առնվազն 40 մանդատ:
