Այս տարի սպասվում է մոտավորապես նույնքան խաղողի բերք, որքան անցած տարի էր՝ շուրջ 230 հազ. տոննա: Նման կանխատեսում «Առաջին լրատվական»-ի հետ զրույցում արեց Խաղողապտղագինեգործության գիտական կենտրոնի մասնագետ Դերենիկ Սաֆարյանը: Նրա խոսքով՝ բերքի այս տարվա քանակը կախված կլինի գարնանային փուլի աշխատանքների կատարման որակից, թեև շուտ է ասել, թե ինչքան բերք կլինի, որովհետև չգիտենք՝ գարնանային կարկտահարություն, ցրտահարություն կլինի՞, թե՞ ոչ: Ամեն դեպքում, մասնագետը գտնում է, որ ռեզերվ կա, և անցած տարվա մակարդակը կարող է լինել:
«Այն այգիները, որոնք թաղված են եղել, բերք կա: Բայց Հոկտեմբերյանի շրջանի կարկտահարված այգիները, որ չեն թաղվել, վերերկրյա մասի միամյա մատերն ամբողջովին ցրտահարված են: Այդ կարկտահարված այգիների վազերի վիճակը լավ չի»,- ասաց Դ. Սաֆարյանը:
Նա նշեց, որ այգեբացի աշխատանքներն ուշացած են սկսվել, բայց արդեն ավարտված են:
